Mbështetja morale ndaj Ukrainës, Rama dhe Abazoviç vizitojnë Kievin

Shqipëria ishte pjesë e Konferencës së Donatorëve, duke ofruar 1 milion euro Dy kryeministrat priten nga Vladimir Zelenski

Kryeministri shqiptar, Edi Rama dhe ai i Malit të Zi, Dritan Abazoviç, nisën dje një vizitë në Ukrainë. Ata shkuan fillimisht në zonat e bombarduara të Borodyankas dhe Irpinit, ndërsa më pas vizituan dhe ekspozitën me dëshmi të pasojave që ka shkaktuar sulmi rus mbi Ukrainën. Gjatë vizitës të dy kryeministrat u takuan dhe me presidentin ukrainas, Volodymyr Zelenskyy. Kryeministrat e të dyja vendeve ballkanike mbërritën në Kiev në orët e para të ditës së djeshme, pas një udhëtimi të gjatë me tren nga Polonia. Të shoqëruar nga autoritetet vendëse, zoti Rama dhe Abazoviç e nisën vizitën e tyre duke parë nga afër pasojat shkatërrimtare të luftës së nisur nga Rusia në Borodyanka dhe Irpin, zona të cilat ishin ndër të parat që u bombarduan dhe ku është deklaruar një numër i lartë civilësh të vrarë e të gjetur nën rrënoja, përfshirë edhe fëmijë. Edhe pamjet e shpërndara nga zyra e kryeministrit shqiptar dëshmojnë lehtësisht dëmet e mëdha në banesa e pallate të rrënuara. Zoti Rama dhe homologu i tij i Malit të Zi, Abazoviç, vizituan më pas një ekspozitë me dëshmitë e agresionit rus në Ukrainë. Në fund të saj, në librin e përshtypjeve kryeministri Rama do të shkruante: “Bota duhet ta ndalë këtë horror dhe Ukraina të dalë e rilindur nga kjo”. Ndërsa për mediat e vendit të tij, kryeministri Abazoviç është shprehur se, “është tragjike ajo që kemi parë dhe dëgjuar”, - duke nënvizuar se, “gjëja më e rëndësishme është ndalimi i sulmeve, agresionit dhe vrasjes së civilëve”. Shqipëria ishte ndër vendet e para që e dënoi agresionin rus në Ukrainë. Ajo sikundër nga ana e vet edhe Mali i zi, u janë bashkuar sanksioneve ndaj RuMinistrja sisë. Edhe vizita e djeshme ishte shenjë e qartë e mbështetjes ndaj Ukrainës. Shqipëria ishte gjithashtu pjesë e Konferencës së Donatorëve për këtë vend, duke ofruar 1 milion euro, ndërkohë që ka dhënë ndihma edhe në ushqime e materiale ushtarake. Vizita e djeshme në Ukrainë vjen në një moment kur Shqipëria kryeson Këshillin e Sigurimit të OKB-së, ku njëkohësisht ajo është edhe penëmbajtëse, së bashku me Shtetet e Bashkuara për çështjen e Ukrainës, duke qenë kështu nismëtare edhe e rezolutave që dënojnë agresionin rus. Kryeministrat Rama dhe Abazoviç u pritën dje në Kiev dhe nga Presidenti i Ukrainës, Volodymyr Zelenskyy. Takimin mes tyre përmes një lidhjeje video e përshëndeti dhe kryeministri i Maqedonisë së Veriut. Në fillim të muajit maj, po përmes një lidhjeje video, presidenti Zelenskyy mbajti një fjalim drejtuar parlamentit shqiptar, duke e falënderuar Shqipërinë për ndihmën e ofruar dhe qëndrimet e mbajtura prej saj. Kryeministrat Rama dhe Abazoviç u pritën më pas dhe nga kryeministri ukrainas, Denys Shmyhal. Brenda godinës ku u zhvillua takimi dukeshin qartë shenjat e një situate lufte, me thasë dheu që krijonin llogore nëpër korridoret e saj.