U arrestua me 20 kg kokainë në vazo lulesh, Agim Kajmaku dhe nipi i tij: Nuk kemi lidhje me drogën
ITALI – Pak ditë pas arrestimit në Itali, Agim Kajmaku dhe nipi i tij, Edmondi, kanë mohuar që të kenë lidhje me sasinë e kokainës prej 20 kg që u kap në vendin fqinj. Mediat italiane kanë zbuluar detaje të reja nga operacioni për arrestimin e ish-kryebashkiakut të Vorës, Agim Kajmaku, i cili u ndalua nga karabinierët e San Benedetto me 18.8 kg kokainë të fshehur brenda vazove të luleve, në një fidanishte në Grottammare. Sipas tyre, lënda narkotike do të dërgohet në Ankona për t’u analizuar, në mënyrë që të përcaktohet përqindja e pastërtisë së drogës. Ndërkohë që hetuesit
ARRESTIMI
vijojnë hetimet për të zbardhur se si mbërriti në fidanishte 18.8 kg kokainë, Kajmaku dhe nipi i tij kanë dëshmuar në policinë italiane dhe kanë thënë se nuk dinë asgjë për praninë e drogës në vazot me lule. Agim Kajmaku, ish-kreu i Bashkisë së Vorës, pronar i një fidanishteje në këtë zonë, jeton me familjen në Monterubbiano, ndërsa nipi i tij jeton në Terra delle Aquile, ku punon si kopshtar. Sipas dëshmisë së Kajmakut dhe nipit të tij, ata shkuan për të blerë bimë në disa fidanishte të zonës dhe i mblodhën në atë të Grottammares, ku duhej të ngarkoheshin. Ish-kryebashkiaku dhe nipi i tij 34-vjeçar me banim në Monterubbiano janë ende të ndaluar dhe mbahen në burgun e Fermos. Ndërkohë, avokati mbrojtës i të dyve, Vittorio Supinoka deklaruar se ka ende shumë punë për të bërë për të zbardhur pozicionin e klientëve të tij. Ai gjithashtu ka folur për mjetin e krimit, një çantë me shirit natriban, por i njëjti shirit nuk do të ishte përdorur për paketimin e pakove me kokainë të fshehura në dheun e bimëve të sekuestruara. Arrestimi i Kajmakut ka qenë në qendër të diskutimeve në seancën e djeshme parlamentare, ku Jorida Tabaku tha se ai ishte “simbol i qeverisë Rama”, teksa ky i fundit, tha se fakti që ai është pas prangave tregon se reforma në drejtësi funksionon. Agim Kajmaku u zgjodh në krye të Bashkisë Vorë në zgjedhjet e 30 qershorit 2019, por u denoncua nga PD-ja se kishte fshehur dënimin në Greqi për falsifikim parash dhe se kjo nuk ishte deklaruar në formularin e dekriminalizimit. Fillimisht kjo u mohua prej tij, por më pas u vërtetua nga prokuroria e Tiranës përmes një letërporosie dërguar autoriteteve greke se ai ishte në kërkim në vitin 2003 për falsifikim të kartëmonedhave dhe nuk ishte arrestuar pasi kishte ikur në Shqipëri.