U gjenden mallra kontrabandë dhe bizhuteri floriri pa faturë tatimore, përfundojnë në pranga dy persona
TIRANË - Policia e Tiranës ka arrestuar dy persona si dhe ka proceduar penalisht 4 të tjerë për kryerjen e veprave të ndryshme penale. Mes tyre, u ndalua shtetasi në kërkim A. S., 42 vjeç, pasi Gjykata e Shkallës së Parë Tiranë i ka caktuar masën e sigurisë “Arrest në burg”, për veprat penale “Kontrabanda me mallra të tjerë”, “Fshehja e të ardhurave” dhe “Mospagimi i taksave dhe tatimeve”. U arrestua në flagrancë shtetasi Xh. M., 56 vjeç, pasi ka ushtruar dhunë ndaj djalit të tij. Ndërkaq, efektivët e Krimit Ekonomik dhe Financiar kanë gjetur mallra të dyshuara të kontrabanduara si dhe bizhuteri floriri pa faturë tatimore, për të cilat disa persona janë nën hetim në gjendje të lirë. Specialistët e Seksionit për Hetimin e Krimit Ekonomik dhe Financiar në DVP Tiranë proceduan në gjendje të lirë shtetasit H. Gj., 33 vjeç, banues në Tiranë, për veprat penale “Kontrabanda me mallra të tjera”, “Tregtimi dhe transportimi i mallrave që janë kontrabandë”, “Fshehja e të ardhurave”, dhe “Shkelja e të drejtave të pronësisë industriale”, pasi gjatë kontrollit të ushtruar nga shërbimet e Policisë në biznesin në administrim të tij, u gjetën dhe u sekuestruan në cilësinë e provës materiale, paketa cigaresh pa pullë fiskale, të dyshuara të kontrabanduara. A. Ç., 63 vjeç dhe R. Ç., 31 vjeç, për veprat penale “Kontrabanda me mallra të tjera”, “Tregtimi dhe transportimi i mallrave që janë kontrabandë”, “Fshehja e të ardhurave” dhe “Shkelja e të drejtave të pronësisë industriale”, kryer në bashkëpunim, pasi gjatë kontrollit të ushtruar nga shërbimet e Policisë në motomjetin e shtetasit A. Ç., që ndodhej në afërsi të biznesit të shtetasit R. Ç., u gjetën dhe u sekuestruan në cilësinë e provës materiale paketa cigaresh pa pullë fiskale, të dyshuara të kontrabanduara. S. V., 43 vjeç, banues në Tiranë, për veprat penale “Kontrabanda me mallra të tjera”, “Shkelja e të drejtave të pronësisë industriale” dhe “Fshehja e të ardhurave”, pasi gjatë kontrollit të ushtruar nga shërbimet e policisë në biznesin e 43-vjeçarit, u gjet dhe u sekuestrua në cilësinë e provës materiale, një sasi bizhuterish floriri, për të cilën nuk dispononte faturë tatimore. Materialet i kaluan prokurorisë për veprime të mëtejshme procedurale.