Motra e Nuredin Dumanit me certifikatë sigurie nga NATO. Reagon MEPJ: U përzgjodh për të kryer praktikën 3-mujore
“Nuk ka pasur akses në informacion të klasifikuar e aq më pak të NATO-s”
Ministria e Jashtme ka reaguar pas disa raportimeve në media se motra e Nuredin Dumanit, të penduarit të drejtësisë, ishte punësuar në këtë dikaster dhe është pajisur me certifikatë sigurie. Në informacionin që ajo ka shpërndare bën me dije se vajza u rekomandua nga Ministria e Arsimit dhe tregon se ajo ka kontratë punësimi deri më 31 dhjetor 2022. Ministria i është përgjigjur interesit të mediave dhe publikut duke sqaruar se motra e Dumanit është përzgjedhur për të kryer praktikën 3-mujore në MEPJ. Ministria pohon se Xhuljana Dumani ka kryer praktikën në gusht 2021 dhe në përfundim të praktikës, për shkak të vlerësimit të performancës së saj nga drejtoria, është lidhur kontrata e punës me afat të paracaktuar 1-vjeçar deri në 31.12.2022, si specialiste në
Drejtorinë e Shërbimeve të Brendshme. Në reagim sqarohet se Xhuljana Dumani nuk ka qenë për asnjë moment e punësuar në Kabinetin e MEPJ. Sipas ministrisë, për punësimin e Xhuljana Dumanit është kërkuar sipas ligjit, dëshmia e penalitetit nga autoritetet përkatëse, e cila ka rezultuar e pastër. Në reagim sqarohet se në asnjë moment zonja në fjalë nuk ka pasur akses në informacion të klasifikuar e aq më pak në informacion të klasifikuar të NATO.
DEKLARATA E PLOTË E MEPJ:
Ditën e djeshme në një numër mediash janë publikuar raportime mbi punësimin në MEPJ dhe pajisjen me certifikate sigurie të motrës së të penduarit të drejtësisë Nuredin Dumani, znj. Xh. D. Nisur nga interesimi që natyrshëm ka ngjallur ky rast, por edhe nga nevoja për të korrigjuar disa pasaktësi në raportimet mediatike, duam të informojmë opinionin publik si më poshtë vijon: Znj. Xh.D, është përzgjedhur për të kryer praktikën 3-mujore në MEPJ. (thirrja VI, Programi Kombëtar i Praktikave të Punës, të Ministrisë së Arsimit, në zbatim të VKM nr. 395, datë 29.04.2015, “Për miratimin e programit kombëtar të praktikave të punës në administratën shtetërore dhe institucionet e tjera publike” e ndryshuar.) Emri i znj. Xh.D ka qenë pjesë e listës që kanë aplikuar për këtë program sjellë në MEPJ nga Ministria e Arsimit. Pas marrjes së listës, ngrihet një komision që bën përzgjedhjen e studentëve, bazuar në metodologjinë e përcaktuar në VKM përkatëse dhe më tej, bazuar te buxheti dhe kërkesat e drejtorive përkatëse të MEPJ, përzgjidhen një numër i caktuar studentësh, për të cilët lidhen kontratat e punës me afat të caktuar 1-vjeçar. Emrat e praktikantëve sugjerohen nga drejtoritë përkatëse, ku ata kanë kryer praktikat e punës. Pra, znj. Xh.D ka hyrë në MEPJ si pjesë e një programi, ku përzgjedhja bazohet vetëm në rezultatet e studentëve dhe që synon krijimin e hapësirave për studentët më të mirë në administratën publike. Znj. Xh.D e ka kryer praktikën në gusht 2021 dhe në përfundim të praktikës, për shkak të vlerësimit të performancës së saj nga drejtoria, është lidhur kontrata e punës me afat të paracaktuar 1-vjeçar deri në 31.12.2022, si specialiste në Drejtorinë e Shërbimeve të Brendshme, Sektori i Shërbimeve. Znj. Xh.D nuk ka qenë për asnjë moment e punësuar në Kabinetin e MEPJ. Për punësimin e znj. Xh.D është kërkuar sipas ligjit, dëshmia e penalitetit nga autoritetet përkatëse, e cila ka rezultuar e pastër. Në përputhje me ligjin, ashtu si për çdo punonjës tjetër të MEPJ, edhe për znj. Xh.D është kërkuar certifikata e sigurisë nga DSIK. Kjo certifikatë është, pas dëshmisë së penalitetit, një tjetër filtër nëpër të cilin kalon çdo punonjës i MEPJ. Duam të sigurojmë publikun, por edhe mediat e interesuara, që në asnjë moment zonja në fjalë nuk ka pasur akses në informacion të klasifikuar e aq më pak në informacion të klasifikuar të NATO. Informacionet e klasifikuara në MEPJ trajtohen me rregulla e procedura të posaçme dhe vetëm një numër i kufizuar punonjësish kanë akses në to.