Lufta ndaj grupeve kriminale, Gjermania e Shqipëria nënshkruajnë marrëveshje bashkëpunimi

TIRANË - Gledis Nano dhe Dieter Romann nënshkruajnë marrëveshjen për bashkëpunim dhe operacione të përbashkëta, ndërmjet Policisë Federale Gjermane dhe Policisë së Shtetit shqiptar. Drejtori i përgjithshëm i Policisë së Shtetit, Gledis Nano, ka kryer dje takime me zyrtarë të lartë të Policisë Federale të Gjermanisë, me qëllim rritjen e bashkëpunimit për shkëmbim informacioni, hetime dhe operacione të përbashkëta në luftën kundër krimit të organizuar, korrupsionit, kontrabandimit të emigrantëve nga vendet e treta dhe terrorizmit. Presidenti i Policisë Federale Gjermane, dr. Dieter Romann, vlerësoi punën dhe rezultatet e arritura nga policia shqiptare në luftën kundër kriminalitetit dhe theksoi se kjo është një luftë sa nacionale ashtu dhe ndërkombëtare. Policia gjermane vlerësoi profesionalizmin e policisë shqiptare dhe theksoi se në këtë kuadër është e nevojshme që në vijim të bashkëpunimit midis dy policive, të ketë akoma më shumë skuadra hetimore të përbashkëta, shkëmbime informacioni në kohë reale dhe operacione të përbashkëta kundër grupeve kriminale që veprojnë në fushën e krimit të organizuar, krimeve të rënda dhe trafiqeve të qenieve njerëzore. Drejtori i përgjithshëm i policisë shqiptare, Gledis Nano, ka siguruar presidentin e Policisë Federale Gjermane, dr. Dieter Romann, se policia shqiptare i ka të gjitha kapacitetet profesionale dhe njerëzore për të qenë në krah dhe e barabartë me policitë partnere, në përmbushje të misioneve të përbashkëta që kanë si qëllim luftën kundër krimit të organizuar dhe terrorizimit. Në fund të takimit, Nano dhe Romann nënshkruan marrëveshjen e bashkëpunimit në kuadër të projektit ndërkombëtar “SCOPE”, që ka në fokus luftën ndaj grupeve të organizuara kriminale që i pajisin emigrantët e parregullt me dokumente të pavlefshme dhe u paraqesin atyre mënyra për të kaluar kufirin, duke shmangur pikat e kontrollit kufitar, si dhe luftën ndaj grupeve të organizuara kriminale, të cilët përmes kësaj veprimtarie të kundërligjshme, rrezikojnë jetën e këtyre subjekteve.