Vrau 2 motrat në “Astir”, me të cilat kishte lidhje intime, prokuroria: Burg përjetë për Përparim Ademin
Kush është 59-vjeçari/ Nga shitja e foshnjave në Greqi, te breshëria e automatikut që zbrazi mbi motrat
Prokuroria e Tiranës ka kërkuar burgim të përjetshëm për Përparim Ademin, i cili akuzohet se vrau dy motra, Kristina Bardhi dhe Zhaneta Metani. Ngjarja e rëndë ndodhi mëngjesin e 31 dhjetorit të vitit të kaluar, në zonën e “Astrit”, në banesën e motrave Metani e Bardhi. Nga hetimet ka rezultuar se 59-vjeçari nuk pranonte ndarjen nga dy motrat me të cilat kishte një lidhje jashtëmartesore. Në dosjen e krimit të rëndë, ku thuhet se autori Përparim Ademi ka marrë peng Zhanetën një ditë para se ta vriste bashkë me të motrën, si dhe e ka kërcënuar që të rikthehej me të. Siç citohet në dosje, Ademi i ka kërkuar Zhanetës që të ndahej nga i dashuri dhe e ka çuar në një hotel, ku edhe kanë kryer marrëdhënie seksuale. “Më datë 30.12.2020 në mëngjes, ka shkuar poshtë pallatit të Zhanetës dhe aty e ka pritur nga ora 06:00 e mëngjesit, kur ajo del për punë. Më pas, ai deklaron se e ka marrë nën kërcënimin e një thike, që kishte me vete dhe e ka futur në një makinë tip ‘Volkswagen Tiguan’. Nga aty e ka çuar në Kërrabë, nga rruga e vjetër e Elbasanit dhe atje kanë ndaluar në një vend pranë lapidarit nja 500 metra më lart dhe kanë biseduar, duke dashur ta detyrojë të kthehej prapë me të dhe të shkëputej nga ai person. Përparimi deklaron se një moment Zhaneta u duk sikur ka pranuar. Më pas, ai i ka thënë të shkonin në një hotel dhe të flisnin aty. Më pas, kanë shkuar në hotel, ku kanë kryer edhe marrëdhënie me dëshirën e saj, pa përdorur dhunë ndaj saj në asnjë moment”, - thuhet në dosje. Më tej, në dosje thuhet: “Në darkë, kur Përparimi ka qenë në shtëpi, e ka marrë në telefon motra Kristina dhe Zhaneta, duke më thënë që kisha kërcënuar, rrahur e përdhunuar Zhanetën. Për këtë arsye do të më bënin denoncim, do të më fusnin në burg etj.. Më thanë se duhet ta lija të lirë Zhanetën, që të vazhdonte me atë djalin. Të nesërmen jam zgjuar në mëngjes dhe kam shkuar te puseta e shtëpisë, ku mbaja automatikun që e kisha fshehur që në vitin 1997”. “Ka qëndruar duke menduar çfarë duhet të bënte dhe në një moment e ka ndarë mendjen, duke i thënë vetes se tradhtia ka vetëm një çmim, vdekjen dhe e ka bindur veten fort për këtë gjë”.
NGJARJA
Përparim Ademi (Tela) është 59-vjeçari që paraditen e 31 dhjetorit 2020 ekzekutoi me automatik bashkëjetuesen e tij, Kristina Bardhi dhe motrën e saj, Zhaneta Metani brenda banesës së tyre në zonën e “Astrit”. Krimi i dyfishtë që tronditi kryeqytetin në vigjilje të ndërrimit të viteve dyshohet se ndodhi pas një konflikti të çastit mes dy bashkëjetuesve, pikërisht për vazhdimin e marrëdhënies së tyre. 59vjeçari shkoi me biçikletë pranë banesës së tyre, ndërsa e shoqëronte nipi i tij. Përparim Ademi ka shkuar i armatosur me kallashnikov, duke e fshehur armën në një çantë. Kur ka mbërritur përpara derës së banesës ku jetonin Zhaneta Metani dhe Kristina Bardhi, Përparim Ademi është përballur me dy motrat. Në këtë moment, pa u futur ende brenda apartamentit, 59vjeçari ka shkrepur armën, gjë e cila vërtetohet nga shenja e plumbit që ka mbetur në derën kryesore të banesës. Pasi ka hyrë në brendësi, Përparim Ademi ka qëlluar me breshëri kallashnikovi mbi të dyja motrat. Zhaneta Metani dhe Kristina Bardhi mbetën të vdekura në vend. Pas ekzekutimit, ai ndoqi të njëjtën rrugë për t’u larguar, por në këmbë dhe jo me biçikletë. Me njërën dorë në xhep, Përparim Ademi është filmuar duke u arratisur nga vendngjarja. Rreth 1 orë më vonë, ai u arrestua nga policia pranë shkollës “Vasil Shanto”. Por e shkuara e tij ishte tejet e errët, pasi siç raportuan edhe mediat greke, Ademi ka kryer një sërë krimesh të rënda në Greqi. Sipas dëshmive të familjarëve të motrave, Ademi i ka sjellë për disa kohë në Selanik për të punuar si prostituta dhe dyshohet se kanë shitur rreth 10 foshnje.