Berisha: Të rikthejmë demokratët e vitit ‘90
“Më 7 korrik hapet sezoni i protestave kundër regjimit monist të Ramës” Kreu i PD-së: Më e madhja që mund të kemi organizuar
Kreu i Partisë Demokratike, Sali Berisha, foli gjatë takimit me anëtaret e forumit të gruas, edhe për protestën e thirrur më datë 7 korrik. Berisha tha se protestat janë një domosdoshmëri për të rrëzuar regjimin monist të Edi Ramës. Lideri demokrat tregoi edhe arsyen përse zgjodhi datën 7 korrik dhe jo të priste më shumë për të dalë në shesh. “Arsyeja tha Berisha - ishte që qytetarët të mos dëshpëroheshin më shumë nga keqqeverisja e Ramës”. Për 7 korrikun, Berisha tha se do të jetë protesta më e madhe që është organizuar ndonjëherë. “Shpallëm datën 7 korrik si protestë kombëtare. E shpallëm këtë datë, sepse konstatonim se pakënaqësia është shumë e madhe ndaj kësaj qeverie dhe në rast se do ta shtynim protestën për një kohë optimale, në fakt do të thellohej dëshpërimi te njerëzit. Nuk e kemi të fshehur, por të hapur. Qëndrimi ynë, platforma jonë, krahas parlamentit dhe formave të tjera do të jetë protesta, protesta dhe vetëm protesta. Protestën e datës 7 korrik e kemi preludin dhe do të bëjmë gjithçka për një protestë më të madhen që mund të kemi organizuar. E kemi preludin e sezonit të protestave kundër regjimit monist të Edi Ramës”, - tha Berisha. Ish-kryeministri Sali Berisha ka deklaruar sërish se nuk i njeh zgjedhjet e 25 prillit. Në fjalën e tij, ai tha se Edi Rama ka vendosur monizmin e plotë, ndërsa shtoi se ai është në krye të qeverisë me vota të vjedhura. Z.Berisha përmendi edhe ish-kryetarin e PD-së, për të cilin deklaroi se, “nëse do të bënte thirrje për protesta pas zgjedhjeve të 25 prillit, Rama nuk do ishte duke qeverisur. Por - shtoi Berisha - Lulzim Basha u mor me zgjedhjet dhe karrigen e tij”. “Kemi një qeveri që ka vendosur monizmin e plotë. Rama në votimin për presidentin me mandate të grabitura, nëpërmjet patronazhistëve, bandave, nëpërmjet blerjes së votës, por mbi të gjitha me përdorimin total të institucioneve shtetërore në funksion të fushatës elektorale. Në zgjedhjet e 25 prillit si kurrë më parë, në fushatë u angazhuan të gjitha institucionet dhe potenciali financiar e njerëzor i shtetit, çka e bën fushatën dhe zgjedhjet të pavlefshme. Kemi të bëjmë me një pushtet që ka dalë nga zgjedhje të dhunuara. Nëse ish-kryetari i PD-së të nesërmen e zgjedhjeve, ose të pasnesërmen do u bënte thirrje demokratëve të mbushnin sheshet, ato zgjedhje nuk legjitimoheshin kurrë. Ai u mor me zgjedhjet e tij, dhe të tjerët s’do të merreshin me kaq hollësi. Kemi një pushtet të dalë nga vota e dhunuar, pushtet i cili me një parti që akumuloi nga viti në vit, sot ka 100 për qind të pushtetit”, - tha Berisha.