Produktiviteti i punës shënon rritje vjetore 20 për qind në krahasim me vitin 2021, hapësira për paga më të larta

Produktiviteti në ekonomi u rrit dukshëm gjatë vitit 2021, pasi prodhimi për punonjës shënoi rritje të shpejtë në krahasim me vitin 2020. Të dhënat e INSTAT tregojnë për një rritje me 21 për qind të produktivitetit të punës në vitin pas pandemisë. Vlera e prodhimit për një të punësuar arriti në rreth 3,2 milionë lekë me 2021 nga 2,6 milionë lekë që ishte në vitin 2020 me një rritje mbi 21 %. Të dhënat tregojnë se rritja ishte më e fortë në sektorin e prodhimit se në atë të shërbimeve. Tek prodhuesit e mallrave vlera e prodhimit për punonjës arriti në 4.8 milionë lekë në vitin 2021 me një rritje 28% në krahasim me vitin 2020. Në sektorin e shërbimeve vlera vjetore e prodhimit për punonjës arriti në 2.2 milionë lekë me rritje 14.7% në krahasim me vitin e mëparshëm. Ritmet e rritjes së prodhimit për punonjës kanë qenë më të lartat e dekadës duke sinjalizuar se ekonomia ka zgjeruar hapësirën për rritjen e pagave. Bizneset me të njëjtin numër punonjësish kanë siguruar një vlerë ë të lartë prodhimi gjatë vitit 2021. Pas pandemisë COVID-19 kërkesa për mallra dhe shërbime u rrit dukshëm në vendin tonë. Kufizimet në lëvizje gjatë vitit 2020 ndikuan në ulje të prodhimit dhe punësimit, por me lirimin e masave me 2021 aktiviteti ekonomik pësoi hov për shkak të kërkesës jo të zakonte. Kërkesa e lartë dhe prodhimi i kufizuar solli rritje të çmimeve, duke ndikuar pozitivisht vlerën e prodhimit për një punonjës. Prodhimi për të punësuar ka pësuar rritje me 19% edhe me vitin para pandemisë 2019. Gjatë dekadës së fundit produktiviteti i punës pati luhatje dhe shpesh pësoi ulje edhe pse ekonomia ishte në rritje. Aksionet për formalizimin e ekonomisë rriten numrin e të punësuarve të ligjshëm, të cilët edhe pse në rritje nuk kishin se si të ndikonin në prodhim. Në Shqipëri punësimi u rrit më shumë se rritja ekonomike, për pasojë të punësuarit ndanë më pak fitime nga puna. Zhvillimet demografike, me plakjen e popullsisë dhe reduktimin e forcës së punës po ushtrojnë presion mbi modelin ekonomik të Shqipërisë. Ekspertët dhe institucionet ndërkombëtare financiare bëjnë thirrje se Shqipëria duhet të rrisë aftësitë mësimore për të orientuar ekonominë drejtë inovacionit dhe sektorëve me produktiv./ MONITOR