Shpejtësi tej normave dhe drejtim mjeti në gjendje të dehur, policia arreston 8 persona, pezullohen 109 patenta në 24 orë
TIRANË - Policia Rrugore ka shtuar kontrollet në rrugë për të parandaluar shkeljen e rregullave të qarkullimit rrugor dhe për të parandaluar aksidentet me pasojë jetën e qytetarëve. Shtimi i kontrolleve vjen pas aksidentit tragjik me 3 të rinj të vdekur dhe 3 persona të plagosur të ndodhur pak ditë më parë tek mbikalimi i TEG-ut, por edhe aksidenteve të tjera me vdekje në vend. Duket se dhe pas tragjedive në rrugë, drejtuesit e mjeteve nuk kanë zënë mend, por vijojnë ende të lëvizin me shpejtësi të lartë, ndaj dhe rrugorët janë hedhur në aksion. Në një njoftim për shtyp, dje policia bëri me dije se gjatë kontrolleve, duke përdorur bazën logjistike bashkëkohore janë pezulluar 109 leje drejtimi, nga të cilat 83 për shpejtësi mbi normat e lejuara në akset kryesore nacionale dhe në qendrat urbane, 22 për drejtim mjeti nën efektin e alkoolit apo në gjendje të dehur dhe 4 për qarkullim në sens të kundërt. Gjithashtu, u raportua se janë arrestuar në flagrancë 8 drejtues mjetesh, nga të cilat 6 për drejtim mjeti në gjendje të dehur dhe 2 për drejtim mjeti pa leje drejtimi.
NJOFTIMI I POLICISË:
Kontrolle intensive, duke përdorur makinat inteligjente, radarët automatikë, dronët, dragerat, kamerat dhe makinat e pauniformuara, për të evidentuar dhe ndëshkuar shkelësit e Kodit Rrugor, që bëhen rrezik potencial për përfshirje në ngjarje rrugore. Kontrollet intensive, me qëllimin e vetëm, parandalimin e ngjarjeve rrugore me pasoja për jetën dhe shëndetin e përdoruesve të rrugës. Gjatë kontrolleve, duke përdorur bazën logjistike bashkëkohore, janë pezulluar 109 leje drejtimi, nga të cilat 83 për shpejtësi mbi normat e lejuara në akset kryesore nacionale dhe në qendrat urbane, 22 për drejtim mjeti nën efektin e alkoolit apo në gjendje të dehur dhe 4 për qarkullim në sens të kundërt. Gjithashtu, gjatë kontrolleve janë arrestuar në flagrancë 8 drejtues mjetesh, nga të cilat 6 për drejtim mjeti në gjendje të dehur dhe 2 për drejtim mjeti pa leje drejtimi. Po gjatë kontrolleve janë evidentuar nga mjetet inteligjente dhe janë ndëshkuar për shpejtësi tej normave të lejuara, por pa sanksionin e pezullimit të lejes së drejtimit, 234 drejtues mjetesh që qarkullonin me shpejtësi, në qendrat e banuara. Janë ndëshkuar për përdorim të celularit gjatë drejtimit të automjetit, 628 drejtues. Janë ndëshkuar 211 drejtues mjetesh për parakalime të gabuara dhe 6 për manovra të gabuara apo gara shpejtësie. 295 drejtues mjetesh janë ndëshkuar për mosvendosje të rripit të sigurimit. 103 drejtues motomjetesh janë ndëshkuar për mosvendosje të kaskës mbrojtëse dhe të shenjave sinjalizuese gjatë natës. Policia e Shtetit apelon për të gjithë përdoruesit e rrugës, që të zbatojnë me rigorozitet rregullat e qarkullimit rrugor, të moderojnë shpejtësinë, të vendosin rripin e sigurimit, të mos përdorin celularin gjatë drejtimit të mjetit dhe të mos kryejnë parakalime të gabuara.