Berisha: Edi Rama shqiptarët i varfëron, vetë bën jetë sheiku
Kreu i PD: Blen për oborrin e zyrave të tij vazo druri 4 mln euro. Nuk njeh asnjë ligj! “Prodhojmë mjaftueshëm energji, por qeveria zbraz digat”
Ish-kryeministri Sali Berisha në një komunikim me qytetarët u shpreh se vendi është i zhytur në korrupsion dhe kjo, për shkak të keqqeverisjes nga kryeministri Edi Rama. Ndërsa denoncoi rastet e korrupsionit në vend, Berisha tha se kryeministri Rama blen për oborrin e zyrave të tij vazo druri plot 4 mln euro. Sillet si një despot i vërtetë, që nuk njeh ligj nuk njeh asnjë normë standard.
Pjesë nga
“Edi Rama e kryeson vetë këtë kupolë hajdutësh, që po shkreton dhe varfëron çdo ditë shqiptarët. Po ndalem në disa shembuj. Ai ka firmosur për ndërtime me procedurë të mbyllur, procedurë antiligjore, tre djegësve 420 mln euro, asnjëri prej tyre nuk ekziston. Edhe njëri që u ndërtua në Elbasan, u morën hekurishte të viteve ‘70 dhe është jashtë funksionit sot. Të gjitha paratë shkojnë në kontot bankare të sipërmarrjes së tij, të Erion Veliajt dhe ministrave të tjerë. Porti i Durrësit është një aferë, e cila në total shkon rreth 5 miliardë euro. Edi Rama ka gjetur një miliarder në Dubai dhe do të ndjekë shembullin e tij për t’u bërë edhe vetë miliarder. Jashtë çdo procedure dhe ligji i ka dhënë atij portin e Durrësit me 820 mijë metra katrorë truall, për të ndërtuar gradaçelën e tij, tokë publike, e cila është pronë e Durrësit dhe Shqipërisë. Rastet janë të pafundme. Vetë bën një jetë sheiku. Me 137 fluturime me çarter me dhomë gjumi luksoze, ka shpenzuar mbi 22 mln euro. Blen për oborrin e zyrave të tij vazo druri plot 4 mln euro, sillet si një despot i vërtetë, që nuk njeh ligj nuk njeh asnjë normë standard. Edi Rama, ju e dini që është i biri i një xhelati të diktaturës komuniste. Kur them xhelat, e them në kuptimin e vërtetë të fjalës. Në diktaturë shoqëria ndahej në shtresat e veta. Në njërën anë qëndronin të përndjekurit, të persekutuarit, të burgosurit politikë, të cilët për fjalën e lirë, për besimin te Zoti, vokacionin perëndimor, dashurinë e kombit, burgoseshin, internoheshin, ekzekutoheshin. Por në anën tjetër ishin në ekstremin tjetër xhelatët e tyre, ata të cilët i torturonin, i burgosnin, ata të cilët firmosnin ekzekutimin e tyre dhe i ekzekutonin. I ati i Edi Ramës ka firmosur në 10 gusht të vitit 1988 ekzekutimin e Havzi Nelës, një poeti disident, i cili në vargjet e tij shkruante për liritë e të drejtat e njeriut, shkruante për
Kosovën dhe frymën e Helsinkit. U ndala këtu në këtë moment jo për të bërë biografi, por ky ishte qëndrimi i etërve të tij ndaj mendimit ndryshe, ndaj mendimi pluralist. Edi Rama sot mban të njëjtin qëndrim ndaj pluralizmit politik”. Ish-kryeministri Sali Berisha në një bashkëbisedim të zhvilluar me demokratët në Londër, u shpreh se kryeministri Edi Rama është kupola e hajdutëve. Gjithashtu, ai theksoi se inceneratorët nuk janë në funksion dhe se të gjitha paratë shkojnë për llogari të Ramës, gjithashtu ai tha vendi prodhon shumë energji elektrike, por sipas tij, qeveritarët e shesin me çmime të ulëta. “Unë shpreh kënaqësinë të bisedoj sot me ju në një moment vërtet të veçantë që po kalon Shqipëria dhe shqiptarët. Ne zhvillojmë këtë foltore me demokratët e Londrës në një kohë kur vendi është pllakosur nga një krizë e frikshme. Shqiptarët e braktisin Shqipërinë, sepse regjimi i sotëm ka vendosur, ka rikthyer monizmin e 32 viteve më parë. Në rast se 32 vite më parë monizmi ishte përqendrimi i të gjitha pushteteve në duart e një partie, sot monizmi bazohet në brutalitetin e krimit dhe drogën dhe fuqinë negative të saj, në vjedhjen e papërmbajtur të qytetarëve shqiptarë. Me këto mekanizma Edi Rama ndërtoi në këto vite narkoshtetin e parë. Pra, zëvendësimin e ligjeve me atë të shtetit mafioz. Jeta e shqiptarëve është e mbushur plot raste të tilla. Një javë më parë u arrestua një nënë me fëmijë 8 ditësh për një gjobë për të cilën nuk ishte njoftuar. Sot buxheti i shqiptarëve vidhet. Çdo punë publike që kryhet në Shqipëri bëhet me një çmim, 6, 8 apo 10 herë më shtrenjtë se sa duhet të ishte në përputhje me manualet. I gjithë buxheti shpërdorohet vidhet nga sekti i ‘rilindjes’ dhe shqiptarët zhyten në varfëri. Të njëjtin fat kanë pasuri publike. Kemi pasur dy vite plot lagështi dhe shira. Shqipëria sot prodhon 2 mld kilovat orë energji elektrike, më shumë se sa nevoja totale e saj. Këta qeveritarë zbrazin diga, shesin energji në verë te sekserët e tyre me çmime të ulëta dhe këta pastaj e shesin në bursë me çmime më të larta dhe më pas i ndajnë me qeveritarët. Zinxhiri i vjedhjeve të tyre nuk ka të ndalur. Pasuritë publike janë sot një mallkim për shqiptarët. Gara e hapur që është ligj në çdo vend të lirë është zëvendësuar me prokurimin sekret. Janë rritur me 25 herë krahasuar me 2013 prokurimet sekrete”, - tha Berisha.