Arben Çejku: Pika më sensitive, padurimi për vendimin e gjykatës

“Pushteti injoroi drejtësinë”

Ish-ambasadori Arben Çejku, i ftuar ditën e sotme në rubrikën “Opinion” në “News 24”, foli për raportin e DASH, ku evidentohet mes shumë problematikash edhe shembja e paligjshme e “Prestige Resort”. Ai u shpreh se sikundër dhe në raport ishte evidentuar, shihet si problem fakti që pushti prevalon mbi sistemin e drejtësisë dhe se injorohet gjykata, pasi shembja e resortit është bërë pa pritur një vendim nga ky institucion. “Edhe pa ardhur te ky raport, ka dhe raporte të tjera. Kemi alarmin që vjen dhe nga media ndërkombëtare për zhvillime alarmante në vend sa i përket prezencës së krimit, por dhe keqpërdorimit të drejtësisë. Në rastin konkret, pika më sensitive është padurimi për të pritur drejtësinë. Pushteti prevalon mbi gjykimin e gjykatës e paragjykon drejtësinë. Injorimi i një organi të pavarur të drejtësisë. Nëse do ishin konsumuar rrugët e drejtësisë, do të ishte tjetër lexim i situatës. Ajo lexohet nga disa këndvështrime, por unë po e lexoj në aspektin që e ka prekur edhe raporti. Përdorimi i ekzekutivit për të denigruar dhe dobësuar fuqinë vendimmarrëse të gjyqësorit. I gjithë raporti tregon sesi po zhvillohet demokracia në Shqipëri. Ka dhe shumë çështje të tjera. Ne jemi duke parë që disa zhvillime nuk janë dhe aq pozitive dhe janë luks i tepruar për Shqipërinë që të provokojmë partnerët tanë me vendime sensitive që lidhen me çështje të sigurisë. Shqipëria duhet të ketë shumë kujdes në ndarjen e çështjeve që lidhen me sigurinë, sepse nuk jemi një vend që mbajë përgjegjësi vetëm për vete, por edhe për vendet mike”, - u shpreh ai.