Kolegji Zgjedhor pranon padinë, detyron KQZ-në të regjistrojë partinë “Lëvizja Bashkë”
Kolegji Zgjedhor vendosi dje pro padisë së partisë “Lëvizja Bashkë” dhe detyron KQZnë ta regjistrojë si subjekt zgjedhor për zgjedhjet e 14 majit. Kjo parti me në krye Arlind Qorin është regjistruar në zgjedhjet lokale të 14 majit. Vendimi u mor dje në seancën e mbajtur në orën 15:00 nga Kolegji Zgjedhor. Në këtë seancë u vendos rrëzimi i vendimit të Komisionit Qendror të Zgjedhjeve për mosregjistrimin e subjektit dhe detyrimin e KQZ-së për regjistrimin. Me këtë vendim Arlind Qori u bashkohet zyrtarisht kandidatëve të partive të tjera në garën për Bashkinë e Tiranës.
VENDIMI:
Sot, më datë 21.03.2023, ora 15:00, trupi gjykues i Kolegjit Zgjedhor Gjyqësor, i përbërë nga gjyqtarët: 1. Alma Kolgjoka (Relatore)
2. Edlira Petri (Anëtare)
3. Sokol Ibi (Anëtar)
4. Manjola Xhaxho (Anëtare)
5. Marsela Dervishi (Anëtare) në seancë gjyqësore të zhvilluar pranë Gjykatës Administrative të Apelit, pasi shqyrtoi •ështjen që i përket:
Paditës: Partia “Lëvizja Bashkë”.
I paditur: Komisioni Qendror i Zgjedhjeve. Objekti: Gjykimin e çështjes në themel duke: 1) rrëzuar vendimin nr.157, datë 09.03.2023 të Komisionerit Shtetëror të Zgjedhjeve; 2) rrëzuar vendimin nr.23 të Komisionit të Ankimimeve dhe Sanksioneve datë 14.03.2023, dhe 3) detyruar Komisionin Qendror të Zgjedhjeve për të marrë vendim për regjistrimin e Partisë Politike “Lëvizja Bashkë” si subjekt zgjedhor për zgjedhjet e organeve për qeverisjen vendore të datës 14 maj 2023. Baza Ligjore: Neni 9 i Kushtetutës së Republikës së Shqipërisë, neni 64, 145, e vijues i Kodit Zgjedhor, nenet 9, 13 dhe 15 të ligjit nr.8580 datë 17.02.2000 “Për Partitë Politike”. Me vendimin nr. 4, datë 21.03.2023, Kolegji Zgjedhor Gjyqësor, VENDOSI:
1. Pranimin e padisë.
2. Detyrimin e palës së paditur Komisioni Qendror i Zgjedhjeve të regjistrojë partinë politike “Lëvizja Bashkë” si subjekt zgjedhor për zgjedhjet e organeve për qeverisjen vendore të datës 14 maj 2023.
3. Shpenzimet gjyqësore në ngarkim të palës së paditur.
4. Ky vendim është i formës së prerë dhe ndaj tij nuk lejohet ankim.
5. U shpall në Tiranë më datë 21.03.2023.
Tiranë, më 21.03.2023
Gjykata Administrative e Apelit Tiranë