Shkaktoi aksidentin e dyfishtë në Vlorë, arrestohet ish-drejtori i Doganës së Fierit, Arlind Lagji

VLORË - Policia e Vlorës ka vënë në pranga ishdrejtorin e Doganës së Fierit, Arlind Lagji, i cili dy ditë më parë shkaktoi dy aksidente të njëpasnjëshme. Policia bëri dje me dije se 46vjeçari, teksa po drejtonte mjetin në gjendje të dehur në rrugën “Gjergj Kastrioti”, aksidentoi një grua rreth të 66-ave e më pas u largua nga vendi i aksidentit dhe ka vijuar lëvizjen. Po në atë aks rrugor, ai është përplasur me automjetin tip “Peugeot” me drejtues një 63-vjeçar. Lagji do të hetohet për veprat penale

“Drejtimi i automjeteve në mënyrë të parregullt”, “Shkelja e rregullave të qarkullimit rrugor” dhe “Largimi nga vendi i aksidentit”. Dy personat e aksidentuar ndodhen në spital jashtë rrezikut për jetën. Pas aksidentit të dyfishtë të shkaktuar nga ish-drejtori i Doganës së Fierit, Arlind Lagji, ku u plagosën dy persona, ka reaguar edhe ish-bashkëshorti i gruas që Lagji kishte një marrëdhënie. Algert Belulaj ka reaguar për “Infrared.a”, duke hedhur akuza të forta mbi të dhe mbi ish-bashkëshorten, ku sipas tij, ai është aksidentuar qëllimisht nga kjo e fundit. Belulaj u shpreh se për aksidentin që i shkaktoi ishbashkëshortes e u mbyll me ndihmën e Lagjit, ekzistojnë të gjitha provat në prokurori dhe frika e tij është se do të dalë i palagur edhe nga aksidenti i djeshëm. Belulaj është shprehur se është dashur të largohet nga Shqipëria, pasi zbuloi tradhtinë e bashkëshortes me ish-kreun e Doganës së Fierit, i cili edhe e dhunoi.

“Ky është rast i përsëritur, pasi më ka goditur dhe është larguar. Ky është një rast i paralajmëruar shumë qartë, se e kam denoncuar atë person në organet e shtetit. Nuk është marrë asnjë masë ndaj atij personi. Ai del në rrugë sikur nuk ka kryer asnjë vepër penale. Unë jam këtu pasi në Shqipëri jam përndjekur nga personi, nga persona të paidentifikuar. Më pas nuk më ka dalë dikush garant, kam kërkuar azil. Në bazë të asaj që konstatoj, dyshoj se Prokuroria e Fierit është e kapur nga krimi. I bëj thirrje opinionit publik se personi në fjalë mund të marrë jetë njerëzish, ai deklaron se është kriminel, që ka dijeni për vrasje”, - tha Belulaj. Konflikti i Lagjit dhe Belulajt u bë publik pak kohë më parë ku ky i fundit denoncoi Lagjin dhe bashkëshorten e tij për lidhjen jashtëmartesore ndërsa pas akuzave, ish-drejtori i Doganës së Fierit u pezullua.