Apeli I GJKKO nuk i jep leje për t’u betuar si kryebashkiak i Himarës, Beleri: U zbatua urdhri i Ramës
TIRANË – Apeli i GJK KO-së ka rrëzuar kërkesën e Fredi Belerit, duke mos i dhënë leje për t’u betuar si kryebashkiak i Himarës. Në një prononcim për mediet pas seancës, mbrojtja e Belerit tha se do bëjnë rekurs në Gjykatën e Lartë. “Duhej bërë betimi, nuk e lënë të bëjë betimin. Ne do ankohemi në Gjykatën e Lartë. Është vendim me elementë të frymës fashiste. Vendimi i shkallës së parë stimulon veprimet e qeverisë për shpalljen gjendjes së jashtëzakonshme në Himarë. Nuk është e vërtetë. Gjykata e la në fuqi pa ndryshuar asnjë pjesë të asaj vendimi. Nuk na u dha arsyetimi, do ta marr tani. Jemi në fund të procesit, e njëjta treshe e kanë marrë rrugë për ta dënuar dhe marrjen e lejes së posaçme. Në kundërshtim edhe me raste të tjera. E duan me çdo kusht bashkinë e Himarës”, tha avokati. Ndërkohë, Fredi Beleri ka reaguar pas vendimit të Apelit të GJKKO-së për të mos e lejuar për t’u betuar. “Gjashtë muaj pas kërkesës time, zbatoi urdherin e Kryeministrit”,-ka deklaruar ai. Kryebashkiaku i zgjedhur i Himarës shprehet se “Gjykata e porositur prej pushtetit politik, goditi edhe një herë zgjedhjet në Himarë”, duke shtuar se pa betimin e tij mandati nuk bëhet efektiv, teksa theksoi se ky është dhunim i të drejtës kushtetuese. “Me forcë pushteti, në kundërshtim me Kushtetutën, dhe me bekimin pa ligj të një gjykate personale të Kryeministrit, po shkelet çdo parim, normë kushtetuese dhe Europiane për mos të lëshuar Bashkinë e Himarës”, pohon Fredi Beleri. Ai deklaron se vëmendja tashmë është tek Kushetuesja, ku ka depozituar disa kërkesa, por thekson se ankimimi i tij për masën sigurimit ende s’ka një datë. “Presioni i Ramës qëndron i rëndë edhe atje. Presim që Gjykata Kushtetuese të paktën të mbrojë Demokracinë, të mbrojë Kushtetutën! Shpresa vdes e fundit, por dita ditës, këtij vendi po i vdes edhe shpresa”, përfundon Beleri.