“Një pakicë kërkon të kontrollojë Shqipërinë”, Basha: Pushteti po mbahet për një grusht klientësh

“Përpëlitjet tregojnë se sa keq e kanë litarin”

Kryetari i Partisë Demokratike Lulzim Basha ka marrë pjesë në kuvendin zgjedhor të degës 8 dhe 2 në Tiranë ditën e sotme. Nga aty Basha ka deklaruar se një pakicë kërkon që Shqipëria të jetë në kontrollin e një grupi politik, me një grusht njerëzish që menaxhojnë pasuritë dhe pushtetin ekonomik. Ai shtoi se vendi është në autokraci, ku njerëzit që sundojnë e kanë marrë pushtetin dhe e mbajnë për veten e tyre dhe për një grusht klientësh të tyre. “Është beteja e një pakice që do të mbajë këtë gjendje. Që e do Shqipërinë kështu, në kontrollin politik të një grupi politik, me një grusht njerëzish që menaxhojnë pasuritë dhe pushtetin ekonomik. Dhe me riciklimin e një grushti fytyrash që kanë dekada që okupojnë median shqiptare. Synimi është i qartë: pasuritë e këtij vendi, paratë e shqiptarëve, fatet e këtij vendi t’i kontrollojë një pakicë absolute. Kjo është autokracia, sundimi i njerëzve që e kanë marrë pushtetin dhe e mbajnë për veten e tyre dhe për një grusht klientësh të tyre”,-u shpreh ai mes të tjerash. Kreu i Partisë Demokratike, Lulzim Basha nuk iu referuar drejtpërdrejt Arben Ahmetajt, ndërsa qëndrimet e tij në një intervistë një natë më parë e cilësoi si përpëlitje. Sipas tij, ato tregojnë se u është mbledhur litari dhe duan të përdorin skena për t’i shpëtuar drejtësisë. “Përpëlitjet e mbrëmshme dhe ato që do të pasojnë ditët dhe javët e ardhshme tregojnë se sa keq u është mbledhur litari atyre që kanë abuzuar me pronat dhe pasuritë e shqiptarëve. Duan ta presin litarin, diku duan të përdorin duart e hallexhinjve, diku duan të përdorin skema të dala jashtë boje që kur i provuan në vendet e tjera që ka pasur reformë në drejtësi, le ta dinë që Partia Demokratike do të qëndrojë fort në hetimin e të korruptuarve pavarësisht emrave të përveçëm dhe ngjyrës së tyre politike dhe vënien e tyre para drejtësisë”,-tha Basha. Sipas tij, Prokurorinë e Posaçme duan ta mbysin, por Basha pretendon se nuk do t’ia dalin për sa kohë mbështetet nga SHBA dhe BE. “SPAK-u është e vetmja shpresë, ndaj duan ta mbysin. Nuk do t’ia dalin, jo vetëm pse PD e mbështet pa kushte, por sepse kemi ne krah SHBA-të dhe BE, vetëm me standardet dhe parimet që kanë shoqëritë e tyre. Sepse perëndimi garanton meritokraci pa pasur në qafë autokratët. Prandaj procesi që kemi nisur është i rëndësishëm. Ne demokratët besojmë se kemi vizionin, programin dhe shumë shpejt ekipin për një shpresë më të mirë. Ky program së shpejti do t’u paraqitet shqiptarëve, për ta nxjerr Shqipërinë nga kjo gropë ku është futur”,- shtoi më tej.