Dosja e sterilizimit/ Ish-ministri Ilir Beqaj paraqitet në SPAK: Mora hard diskun me të dhënat e laptopit
TIRANË – Ish-ministri i Shëndetësisë, Ilir Beqaj u paraqit dje në ambientet e Prokurorisë së Posaçme. Ndaj Beqajt me kërkesë të SPAK, Gjykata ka caktuar masën detyrim paraqitje për akuzën e shpërdorimit të detyrës. Ai qëndroi më pak se një orë para prokurorëve, të cilët i rikthyen edhe hard diskun e laptopit. Pas daljes nga SPAK, Beqaj tha për mediat: “Sot ishte e premte, dita e paraqitjes, por mora edhe hard drive me të dhënat e laptop, që është sekuestruar në apartamentin tim më 28 dhjetor.” Hetimi për ish- ministrin Beqaj bën fjalë për koncesionin e sterilizimit me vlerë 100 milionë euro dhe afat 10-vjeçar, të fituar nga biznesmeni Ilir Rrapaj tashmë i arrestuar bashkë me ish-zv.ministrin e Shëndetësisë, Klodian Rrjepaj. Në fund të muajit dhjetor banesa e ish-ministrit të Shëndetësisë, Ilir Beqaj u kontrolluan nga Byroja Kombëtare e Hetimit pas një hetimi të dytë që lidhet me Agjencinë e Koordinimit të Ndihmës, SASPAC. Beqaj konfirmoi kontrollin në banesë, por pretendoi se vendimi i gjykatës fliste për një person tjetër. Për Beqajn, është në fuqi masa e dhënë nga Gjykata e Posaçme, “Detyrim paraqitje”. Situata e ish-ministrit të Shëndetësisë, u rëndua gjatë muajit nëntor 2023, pak muaj pasi SPAK mori aprovimin e gjykatës për caktimin e masave të sigurimit personal, arrest me burg për biznesmenin Ilir Rrapaj. Beqaj vazhdimisht ka deklaruar se vetëm ka kryer detyrën, ndonëse nga ana tjetër SPAK disponon dokumente, nga të cilat dyshon se Beqaj me veprimet dhe mosveprimet e tij, ka shpërdoruar detyrën.