Energjia nga burimet e rinovueshme, ERE gati metodologjinë mbi detyrimin që do të paguhet

Enti Rregullator i En ergjisë (ERE) finalizoi së fundmi metodologjinë që përllogarit detyrimin që do të paguhet nga konsumatorët fundorë për energjinë e rinovueshme. Drafti i kësaj metodologjie parashikon një sërë elementësh të rëndësishëm të lidhura me sistemin duke filluar nga roli dhe përgjegjësitë e Operatorit të Energjisë së Rinovueshme tek roli i furnizuesve, parashikimin vjetor të sasisë së energjisë që prodhohet nga prodhuesit me përparësi apo llogaritjen e detyrimit sipas kontratës si një formë për të nxitur burimet e rinovueshme të energjisë. Referuar dokumentit ERE do të përcaktojë vlerën e detyrimit për energjinë e rinovueshme në lekë për kWh të ngarkuar në çdo klient fundor sipas sasisë përkatëse të energjisë elektrike të matur dhe të furnizuar nga furnizuesit për këta klientë. Ky detyrim sipas dokumentit merr parasysh një sërë elementësh që janë pjesë e formulës. Por cilët janë këta elementë. 1.Mbështetja FiT nënkupton vlerën e mbështetjes që duhet t’i paguhet kontratave FiT për prodhuesit e vegjël me përparësi ose kontratave

FiT për prodhuesit me përparësi të dhëna sipas procedurave konkurruese. 2. Mbështetja CfD (Kontratë për Diferencë) nënkupton vlerën e mbështetjes që duhet t’u paguhet prodhuesve me përparësi me kontrata CfD. 3.Kostot e balancimit nënkupton kostot e balancimit të shkaktuara nga prodhuesit e vegjël të energjisë së rinovueshme ose kur është e aplikueshme kostot e shkaktuara mbi kufirin e tarifës së balancimit të vendosur në MBE respektive me prodhuesit me përparësi. 4. Kapitali i punës/ kostot e likuiditetit nënkuptojnë kostot e kapitalit të punës për Operatorin e Energjisë së Rinovueshme dhe kostot e rezervës/provizionit për të siguruar likuiditet në sasi të mjaftueshme dhe në vazhdimësi për të garantuar përmbushjen nga OER në kohën e duhur të të gjitha detyrimeve të CfD/MBE në përputhje me termat dhe kushtet e përcaktuara në CfD/MBE. 5. Kostot e përditshme operative dhe të mirëmbajtjes së OER nënkuptojnë shpenzimet e realizuara në mënyrë të arsyshme nga OER për operacionet e saj ditore. 6. Faktori i rakordimit/korrigjimit nënkupton një faktor që rregullon diferencat ndërmjet vlerave të parashikuara të të ardhurave dhe shpenzimeve si dhe vlerave të realizuara të fondit të vitit të kaluar. 7. Përcaktimi i grupeve të konsumatorëve fundorë (Q), përfshirë klientët familjarë dhe klientët e jo familjarë, të cilëve do t’u kërkohet të paguajnë detyrimin e e energjisë së rinovueshme, duke përllogaritur totalin e konsumit të energjisë elektrike në kËh për grupet përkatëse të konsumatorëve fundorë për periudhën respektive. Pas përcaktimit të detyrimit duke respektuar formulën e Entit metodologjia nënvizon se çdo faturë e energjisë elektrike e faturuar nga furnizuesi i energjisë elektrike për një konsumator fundorë do të përfshijë detyrimin e energjisë së rinovueshme të faturuar shprehimisht nga furnizuesi i tyre i energjisë elektrike. Deri në krijimin e OER këtë rol do ta luajë Furnizuesi i Tregut të Lirë. Prodhuesit me përparësi ndërkohë do të kenë detyrimin që brenda datës 1 shtator të çdo viti të dërgojnë një parashikim vjetor të vëllimit të energjisë elektrike që pritet të gjenerohet nga burimet e rinovueshme./ MONITOR