Më 16 shkurt çelet thirrja për mbështetjen e start-up-eve, ministrja Ibrahimaj: Janë 3 mln euro në dispozicion për këtë vit
Më 16 shkurt çelet thirrja për vitin 2024 për mbështetjen e start-up-eve. Në buxhetin e shtetit janë parashikuar 3 milionë euro për këtë vit, nga të cilat pritet të përfitojnë rreth 50-80 start-up-e.
Ministrja e Shtetit për Sipërmarrjen Delina Ibrahimaj deklaroi se do të mbështeten projektet dhe start-up-et e reja në faza të ndryshme zhvillimi, me një masë që varion nga 1.5 milionë lekë në fazën fillestare, deri në 9 milionë lekë në fazën e tretë. “Miratuam një vendim që është shumë i rëndësishëm për zhvillimin e ekosistemeve të start-up-eve. Kjo VKM do t’i hapë rrugë çeljes së thirrjes për vitin 2024, e cila parashikohet të çelet në datën 16 shkurt, e cila do të mbështesë start up-et në tre faza të ndryshme të zhvillimit të tyre. Do të mbështes start-up-et që janë në fazën fillestare me një fond maksimalisht 1.5 milionë lekësh. Mund të aplikojë çdo individ, i ri, student, nomad digjital, i cili nuk është nevojshëm të jetë i regjistruar në qendrën e biznesit, por që ka një ide që do të zhvillojë, dhe që do gjejë financim në një fazë prej 1.5 milionë lekë.
Në fazën e dytë, në fazën e validimit do të mbështeten ato subjekte që kanë minimalisht një vit që operojnë, pra që kanë dorëzuar një palë pasqyra financiare dhe që kanë krijuar një prototip. Kjo kategori do të mbështetet në masën 4.5 milionë lekë. Ndërkohë që do jetë dhe një kategori e tretë e mbështetjes, ata që kategorizohen në fazën e rritjes, ku prototipi është zhvilluar dhe është i tregtueshëm dhe ka nevojë që të ndërkombëtarizohet. Këto subjekte do të mbështeten në masën maksimale prej 9 milionë lekësh. Janë 3 milionë euro të parashikuara në buxhetin e shtetit për mbështetjen e start-up-ve dhe lehtësuesve. Nëpërmjet kësaj thirrje në synojmë të mbështesim minimalisht 50-80 projekte të mira, të cilat do ti shërbejnë bizneseve ekzistuese pasi qëllimi është ndërlidhja e ideve novatore për zhvillimin e bizneseve ekzistuese në sektorët që ka nevojë për inovacion”,tha ministrja. Thirrja do të jetë e hapur për 30 ditë./ MONITOR