Bardhi, Nikollës: Të heqë dorë nga arroganca, të ndalë përjashtimet
Dhurata Çupi pas seancës së tensionuar në Kuvend: Kërkojmë të drejtat “Keqardhje për disa kolegë opozitarë që shkuan”
Pas përfundimit të seancës plenare, mes kaosit, Gazment Bardhi i bëri thirrje Lindita Nikollës që të heqë dorë nga ato që ai i cilëson veprime të paligjshme.
“Edhe sot e patë se me urdhër të paligjshëm, pjesa dërrmuese e opozitës nuk u lejuan që të futen në sallë. Përsëri grupi parlamentar i PD vijoi aksionin për t’i sqaruar shqiptarëve se ky nuk është Kuvendi normal. I bëj apel Nikollën, që të shoh kërkesën për komisionet dhe të heqë dorë nga arroganca dhe masat, përmes përjashtimeve masive. Unë u përjashtova nga Kuvendi se nuk u lejova që të futem në seancën plenare. I kërkova llogari kryetares për pengesën që mu bë. Keqardhje për disa kolegë opozitarë që iu bindën mazhorancës dhe shkuan 1 orë para në Kuvend”,-tha ai.
Deputetja e PD Dhurata Çupi, ka reaguar pas situatës së djeshme në Kuvend. Në një postim në rrjetet sociale ajo u shpreh se në një vend demokratik Parlamenti ka detyrë të kontrollojë dhe të sfidojë punën e qeverisë, të hartojë dhe të ndryshojë ligje dhe të debatojë për çështje të rëndësishme.
Ajo u shpreh se Parlamenti ka humbur tashmë të tria funksionet, ndërsa ka shtuar se qeveria po bën gjithçka të zhbëjë edhe pluralizmin përmes shpërbërjes, përçarjes, kontrollit të opozitës.
POSTIMI
Në një vend demokratik, Parlamenti ka 3 funksione kryesore: 1. Të kontrollojë dhe të sfidojë punën e qeverisë; 2. Të hartojë dhe të ndryshojë ligje; 3. Të debatojë për çështje të rëndësishme Të tria këto funksione Parlamenti i Shqipërisë i ka humbur. Sot jo vetëm që nuk jemi më as demokraci funksionale, por qeveria po bën gjithçka të zhbëjë edhe pluralizmin përmes shpërbërjes, përçarjes, kontrollit të opozitës.
Në një seancë të turpshme, që nuk respekton asnjë nga funksionet normale të Parlamentit, i kërkova Kryetares së Kuvendit të heqin dorë nga kjo politikë antidemokratike dhe antiopozitare.
Ne kërkojmë të drejtat e mohuara që na takojnë me Kushtetutë! Nuk duam ne që të ushtrojmë forcë, por ne nuk pranojmë të shndërrohemi në kartonë të qeverisë. Është një rrugë e vështirë, por jo e pamundur!
Sado e vështirë të jetë, siç i thotë një fjalë e urtë, 3 gjëra nuk fshihen dot: dielli, hëna, e vërteta!