Rama: Ahmetaj? Drejtësia të mos ndikohet, nuk është punë për mua
“Ndihet viktimë e forcave të errëta, s’është për ne ta shpjegojmë këtë” “Ka çështje me drejtësinë, të merret me të”
Kreu i qeverisë është ndalur para gazetarëve pas mbylljes së mbledhjes së Asamblesë Kombëtare të PS, e cila ka zgjatur plotë 5 orë, me dyer të mbyllura. Një nga pyetjet që iu drejtua kreut të ekzekutivit, Edi Rama, ishte lidhur me vizitën që pritet të zhvillojë në Tiranë Sekretari amerikan i Shtetit Antony Blinken. Gazetarja e pyeti Ramën nëse ka ndonjë domethënie që vizita e tij do të jetë në të njëjtën ditë që pritet të jepet vendimi për çështjen ‘McGonigal’.
Ka qenë kjo pyetje që e ka bërë Ramën të qeshë duke thënë: Mirupafshim!
Gazetarja: A ka ndonjë domethënie që Antony Blinken vjen në të njëjtën ditë që jepet vendimi për çështjen McGonigal?
Rama: Hahaha, mirupafshim!
Pas përfundimit të mbledhjes së Asamblesë Kombëtare të PS, Edi Rama është ndalur para gazetarëve. Mes të tjerash, ai është pyetur lidhur me deklaratat e ish-zv. kryeministrit Arben Ahmetaj, kur tha se është kërcënuar prej tij në mbledhjen e Kryesisë.
Rama u shpreh se PS e ka shumë të qartë pozicionin e vet dhe se është detyra e tyre që drejtësisë t’i japin të gjitha mundësitë që të bëjë punën e vet, e pashqetësuar as nga komentet e atyre që përfaqësojnë PS. “PS nuk komenton çështje që lidhen me drejtësinë. Çdokush që ka çështje me drejtësinë i ka me drejtësinë. Ka një karakteristika të të gjithë atyre që kanë çështje me drejtësinë që ndjehen viktima të forcave të errëta apo forcave të tjera, por nuk është fare për mua dhe për ne ta shpjegojmë këtë fenomen”,-tha ai.
A e keni kërcënuar Ahmetajn në mbledhjen e kryesisë?
Edi Rama: PS e ka shumë të qartë pozicionin e vet, mund të pyesin sa herë të doni, është liria juaj, por është detyra jonë që drejtësisë t’i japim të gjitha mundësitë të bëjë punën e vet, e pashqetësuar as nga komentet e atyre që përfaqësojnë PS.
Kryeministri Edi Rama e ka cilësuar një mbledhje shumë të mirë atë të Asamblesë Kombëtare të PS, e cila u mbajt dje në Tiranë me dyer të mbyllura.
Kreu i qeverisë u shpreh se ka pasur kritika dhe vetëkritika nga anëtarët, pasi sipas tij pakënaqësia është një element i rëndësishëm që e bën PS të ecë përpara. “Kam pakënaqësi për çdo gjë që bëj vetë, për çdo gjë që bën partia, sepse pakënaqësia më ka çuar dhe më çon përpara. Ndryshe nuk do kishim çfarë t’i jepnim këtij vendi”,-tha ai.
“Ne kemi bërë një mbledhje të gjatë me diskutime të shumta, ka qenë një mbledhje pune, dhe në mbledhje të tilla ka ballafaqime me fakte dhe opinione të mbledhura në një proces shumë kapilar që ne kemi nisur. Ka shqetësime që vijnë nga organizata të ndryshme të partisë, nga zgjedhës që kanë votuar ose jo PS. Nëse mund të flasim për kritika, ka pasur një qasje vetëkritike nga të gjithë së bashku, duke nisur nga unë. Mos i besoni shumë mënyrës sesi rrjedhin gjërat, sepse duhen verifikuar në burimet. Jemi të kënaqur nga kjo mbledhje. Në zgjedhjet e ardhme duam të marrin rezultatin shembullor”,-u shpreh Rama para gazetarëve, pas mbylljes së punimeve të Asamblesë.
Ai deklaroi se kanë miratuar planin e veprimit 15 shkurt-15 mars, ndërsa shtoi se sipas parashikimeve në zgjedhjet e ardhshme PS sipas tij do të marrë fitore shembullore. “Jam këtu me sekretarin e përgjithshëm për të informuar se jemi shumë të kënaqur nga kjo mbledhje. Kemi miratuar planin e veprimit për periudhën 15 shkurt 15 mars kur nisin zgjedhjet në të gjithë organizatën tonë politike. Në 16 mars do të rimblidhet Asambleja Kombëtare në Durrës për të parë ecurinë e procesit që do të zhvillohet gjatë këtij muaji e do të rihyjnë në proces për zgjedhje të cilat parashikojnë të përfundojnë në 15 prill. Nga 15 prilli do të përgatitet procesin e zgjedhjeve me një anëtar e një votë për të zgjedhur delegatët e kongresit në qershor. Kështu që jemi sipas parashikimeve dhe në funksion të objektivit që në zgjedhjet e ardhshme të marrim fitoren më shembullore të të gjithë këtyre proceseve zgjedhore”,- shtoi Rama.
Pzetje: Në shifra mund të na thoni se sa janë anëtarësimet e reja?
Kryeministri Edi Rama: Kemi konstatuar me kënaqësi që në këtë proces paraprak kanë marrë pjesë aktivisht mbi 55 mijë anëtarë të Partisë Socialiste. Ka pasur një sërë problematikash të lidhura me organizimin, me komunikimin me të gjithë anëtarët, duke pasur parasysh që ka lëvizje demografike të brendshme edhe nga brenda-jashtë, edhe nga jashtëbrenda. Kështu që, do të shikojmë në fund të procesit, sepse nuk jemi nxituar me anëtarësimet e reja. Na është dashur të bëjmë njëherë një skanim objektiv të situatës në territor, ndërkohë që ka pasur anëtarësime të reja, por nuk ka qenë ky objektivi i kësaj faze.
Ndërkohë që faza e muajit të punës, midis 15 shkurtit dhe marsit, është faza kur do të merremi konkretisht edhe me anëtarësimet e reja sepse tani ky proces do të akselerohet.