Jorida Tabaku: Në Parlament janë 4 ligje kundër frymës së legjislacionit të BE-së
“Politika të mos mbajë peng procesin e integrimit”
Deputetja Jorida Tabaku është shprehur se politika nuk duhet të mbajë peng procesin e integrimit të vendit. Tabaku deklaroi se në Kuvendin e Shqipërisë janë 4 ligje kundër frymës së legjislacionit të BE-së.
“Duke filluar nga ligji i prokurimeve publike i cili shkel Marrëveshjen e Stabilizim Asocimit deri tek ligji i lojërave të fatit, një ligj i porositur, tek ligji për zonat e mbrojtura i cili vjen në kundërshtim me legjislacionin e BE-së për mjedisin, duke vazhduar me ligjin e investimeve strategjike i cili shkel përsëri MSA-në dhe konkurrencën”,-shprehet Tabaku.
Reagimi i Tabakut
Është bërë e udhës sot që të përdoret fjala integrim vend e pa vend. Në një sallë të mbushur plot me administratën publike që shkon me lista pamë aktorë të cilët kujtojnë sikur të japësh shfaqje do të thotë që të punosh për procesin e integrimit. Ndërkohë që flasim, të paktën 4 ligje janë në Parlament, të cilët janë jo vetëm frymës së legjislacionit të BE-së. Duke filluar nga ligji i prokurimeve publike, i cili shkel Marrëveshjen e
Stabilizim Asocimit deri tek ligji i lojërave të fatit, një ligj i porositur, tek ligji për zonat e mbrojtura i cili vjen në kundërshtim me legjislacionin e BE-së për mjedisin, duke vazhduar me ligjin e investimeve strategjike i cili shkel përsëri MSA-në dhe konkurrencën. Në këtë lojën e fjalëve, në këto 10 vite të gjata “u hapën , nuk u hapën negociatat”, i penalizuari më i madh ka qenë administrata publike. Sot procesi i integrimit ka nevojë që të zgjerojë rrugën e negociatave, të mos i mbajë ato vetëm në nivel teknik, të ftojë të rinjtë që kanë studiuar jashtë, të hapë procesin jashtë teorizimeve politike nepotike që fatkeqësisht sot kanë zënë vend në administratën publike , të ftojë shoqërinë civile, grupet e interesit e ta bëjë këtë një proces kombëtar. Askush nuk ka nevojë për shfaqje, askush nuk ka nevojë as për teatër, as për aktorë; shqiptarët sot presin të vendosen njerëzit e qytetarët në qendër të këtij procesi. Mos ta mbajë peng politika! Kjo do të thotë të punosh për integrimin, të vendosësh njerëzit në qendër e të mendosh për Shqipërinë e për të ardhmen!