“Skandal, zjarr në spital”/ Flakët përfshinë urgjencën e QSUT, familjarët e pacientëve: E zbritëm mamin nga shkallët

“Në orët e para të mëngjesit të ditës së sotme në katin -1 të godinës së QSUT është raportuar tym. Menjëherë janë marrë masat për sigurimin e pacientëve të shtruar dhe situata u vu nën kontroll në një kohë rekord dhe shkaqet e tymit po hetohen. Situata është në monitorim të vazhdueshëm dhe pacientët janë të gjithë jashtë rrezikut për jetën, falë anagazhimit të personelit mjekësor dhe atij zjarrëfikës. Çdo gjë është nën kontroll dhe gjendja paraqitet e qetë”, thuhet në reagimin e QSUT.

TIRANË – Pas rënies së zjarrit në katin e nëndheshëm të Urgjencës së re në Qendrën Spitalore Universitare “Nënë Tereza” , për evakuimin e pacientëve gjendja e të cilëve nuk ishte e mirë ndihmuan jo vetëm mjekët dhe familjarët, por edhe policia e Tiranës, e cila ndihmoi në zbritjen e pacientëve nga shkallet me barrela. Traumatike ka qenë situata edhe për familjarët e pacientëve, të cilët u zgjuan në mëngjes nga telefonata që kërkonin ndihmë. “Më mori mami në telefon në 5 të mëngjesit më tha ‘ka rënë zjarr’, e mora bashkë me motrën e zbritëm nga shkallët nuk kishte as karrocë as barrelë dhe ashensorët nuk punonin”,-tregoi një qytetar. “Kam të afërmen këtu nuk po më përgjigjet në telefon”,-tha një tjetër. “Dëgjova sirena në mëngjes u shqetësova. Në orën gjashtë pashë pacientët që dolën jashtë tani po shkoj të vizitoj të afërmen”,-tregoi qytetarja. “Skandal të bjerë zjarri në spital”, tha njëri prej tyre. Por jo të gjithë qytetarët u informuan se urgjenca e QSUT ishte jashtë funksionit për shkak të incidentit këtë të diel. Makina me të sëmurë urgjent vijonin të vinin në dyer të spitalit që më pas stafi I orientonte ti drejtoheshin spitalit të traumës ose Spitalit Shefqet Ndroqi. Nga vëzhgimet në terren e një grupi ekspertësh dhe shërbimi zjarrfikës dyshojnë se zjarri ka ardhur nga një shkëndijë elektrike e një baterie në një nga dhomat teknike të katit minus 1 të kësaj urgjence. Djegia e këtyre baterive shkaktoi një tym toksik që detyroi evakuimin e gjithë urgjencës. Nga rënia e alarmit vatra u izolua menjëherë dhe dëmet janë të vogla vetëm në një prej dhomave teknike por fillimisht risku ishte mjaft i lartë pasi në katet e nëndheshme ndodhen dhe lëndë nukleare të cilat përdoren për pajisjet e imazherisë./ TC