Moti i keq/ Rrëshqitje gurësh në bypassin e Murrizit, bllokohet një orë rruga, krijohet rradhë e gjatë makinash

Bllokohet qarkullimi te Ura e Leklit-Këlcyrë

Moti i keq përfshiu dje thuajse të gjithë vendin. Tirana u zbardh nga breshëri për pak minuta. Ndërsa, Bypassi i Murrizit në kahun e Tiranës u bllokua dje plotësisht prej një ore. Mësohet se shkak i bllokimit të bypassit është bërë rrëshqitja e gurëvë në rrugë. Një borëpastruese u nis drejt këtij aksi, por ishte e pamundur të ndërhyjë në pikën ku makinat kanë mbetur të bllokuara. Një tjetër aks I bllokuar u raportua ditën e djeshme, pas ndryshimit të motit në vend. Për shkak të erërave të forta janë rrëzuar disa pemë , të cilat kanë sjellë bllokimin e rrugës kombëtare Ura e Leklit- Këlcyrë në drejtim të zonës së Përmetit. Pemët janë rrëzuar në vendin e quajtur Uji i Zi ku ka bllokuar qarkullimin e mjeteve në drejtim të Këlcyrës dhe Përmetit. Mësohet se po pritet ndërhyrja e strukturave përkatëse për largimin e pemëve të rrëzuar dhe rifillimin e qarkullimit të mjeteve. Moti i keq në qarkun e Gjirokastrës ka shkaktuar probleme edhe për furnizimin me energji elektrike në zonat malore. Ndërkohë, Shërbimi Meteorologjik Ushtarak parashikon që moti i paqëndrueshëm me reshje shiu me intensitet të ulët deri mesatar në formën e rrebesheve afatshkurtra dhe shtrëngatave në pothuajse të gjithë territorin do të vijojë edhe të hënën. Këtë javë vendi ynë do të ndikohet nga një “luftë” dhe “përplasje” e qarkullimit anticiklonar me masa ajrore të lagështa veriperëndimore me qarkullimin ciklonar shoqëruar me masa ajrore relativisht të thata dhe të ngrohta jugperëndimore.

Ditën e Hënë moti do të jetë i paqëndrueshëm, me reshje shiu me intensitet të ulët deri mesatar në formën e rrebesheve afatshkurtra dhe shtrëngatave në pothuajse të gjithë territorin. Reshjet

e borës do të jenë me intensitet të ulët përgjatë maleve në veri, verilindje dhe juglindje të vendit. Ditën e Martë moti do të jetë me kthjellime dhe alternime vranësirash, të cilat do të pasohen me reshje lokale shiu me intensitet të ulët në qendër dhe në lindje të vendit.

Ditën e Mërkurë, kur dhe është Shën Valentini, të Ejnten dhe të Premten moti parashikohet i qëndrueshëm me mbizotërim të motit të kthjellët, ndërsa vranësirat do të jenë të pakta dhe kalimtare.

Era në pjesën më të madhe të ditëve do të fryjë me drejtim verilindje-veriperëndim me shpejtësi 1-8m/ s, ndërsa përgjatë vijës bregdetare dhe lugina fiton shpejtësi deri 16m/s shoqëruar me valëzim në dete të forcës 2-4ballë. Mjegulla dhe mjegullina do të jenë prezente gjatë orëve të mëngjesit në zonat luginore dhe pjesërisht zonat e ulëta.