Ndotje alarmante nga hidrokarburet në Zharrëz, ambientalistët: Dëme të mëdha, një vit më parë denoncuam mbetjet
FIER - Banorët e Zharrëzës në Patos kanë ngritur alarmin se një gropë që shërben për depozitimin e mbetjeve të naftës po u rrezikon atyre jetën. Të njëjtin problematikë e ka denconcuar edhe shoqata “Zharrëza”. Sipas kësaj shoqate, gropa me mbetje të naftës është e paizoluar dhe po helmon puset e ujit të banorëve, gjithashtu po dëmton edhe ullinjtë e zonës. Mësohet se gropa ekologjike pranë sektorit nr .7-të në zonën naftëmbajtëse të Zharrëzës, gjatë pesë ditëve të fundit është mbushur me derdhje hidrokarbure duke e kthyer në një bombë ekologjike për zonën dhe banorët e saj. Një përfaqësi e shoqatës ambientaliste ka denoncuar në media se gropa ekologjike që ndodhet fare pranë banesave të një lagjeje në Zharrëz po rrezikon seriozisht jetën e banorëve të kësaj zone, nga çlirimi i gazrave toksikë. Sipas ambientalistëve kjo gropë është pa leje mjedisore dhe jashtë kushteve teknike. Edhe pse ata denoncuan pranë institucioneve që një vit më parë kompaninë Albpetrol kur në këtë gropë u depozituan 320 tonë mbetje hidrokarbure ende nuk është marrë asnjë masë për mbetjet që vijojnë të depozitohen duke rrezikuar kontaminimin e tokave bujqësore dhe ujërat nëntokësore që kanë lidhje me puset e ujit të pijshëm. Në zonën naftëmbajtëse të Zharrëzës ekzistojnë 4 gropa ekologjike nga të cilat gropa pranë sektori 7 vijon të jetë pa leje mjedisore pavarësisht denoncimeve të vazhdueshme të banoreve dhe ambientalistëve. Në lidhje me këtë problematikë është kontaktuar drejtori i kompanisë Albpetrol Eltar Deda, por ai ka refuzuar të përgjigjet duke mos dhënë asnjë sqarim për rrezikun që i kanosët banorëve të Zharrëzës në zonën e Patosit.