Firmoset Federatata e Opozitës së Bashkuar: Kemi qëllim të përbashkët
Bashkohen partitë: Qeveria kontrollon të gjitha pushtetet në vend “E çmojmë si detyrim bashkëpunimin opozitar”
Përfundon takimi mes partive të opozitës me qëllim krijimin e konfederatës. Në takim morën pjesë Partia Demokratike, Balli Kombëtar, Partia e Bashkimit Liberal Demokrat, Partia Demokristiane, PAA, PR, PBDNJ, Partia e Lirisë, FRD, Partia Balli Kombëtar Demokrat, Lëvizja e Legalitetet, Bashkimi Demokrat Shqiptar. Zbardhet dokumenti i marrëveshjes së firmosur mes disa partive politike opozitare në vend, që kanë si qëllim mbajtjen e zgjedhjeve të lira dhe të ndershme.
Dokumenti i marrëveshjes mban firmat e Sali Berishës, Ilir Metës, Agron Dukës, Fatmir Mediut, Vangjel Dules, Nard Ndokës, Artur Roshit, Ardiatik Alimadhit, Ylber Valterit, Arian Starovës dhe Sali Shehut.
Në dokumentin e siguruar për BalkanWeb nga gazetari Osman Stafa citohen disa pika të marrëveshjes, siç është garantimi i zgjedhjeve të lira, sipas rekomandimeve të OSBE-ODIHR. Zbardhet marrëveshja që u firmos sot (dje) mes disa partive politike opozitare. Bëhet fjalë për grupimin e Berishës, Partinë e Lirisë, partia e Agron Dukës, Fatmir Mediut, etj. Po ashtu gazetari Osman Stafa ka raportuar live se ftesë për të marrë pjesë ka pasur dhe Lulzim Basha, por duket se ky i fundit ka refuzuar. Burime për gazetarin thanë se Fatmir Mediu dhe Agron Duka ditën e djeshme, kanë njoftuar Lulzim Bashën për platformën e tyre të bashkimit të opozitës në një “Federatë”. Basha nuk ka kthyer asnjë përgjigje për propozimin që ka ardhur nga aleatet historik të Partisë Demokratike.
PLATFORMË POLITIKE E FEDERATËS SË OPOZITËS SË BASHKUAR 2
Ne, përfaqësuesit e partive opozitare:
Duke vlerësuar me shqetësim situatën e rëndë në Ballkan, interesin tonë si shqiptarë dhe si vend anëtar i NATO-s, dhe duke qenë të ndërgjegjshëm që për t‘ju përgjigjur sfidave të sigurisë dhe një Shqipërie Europiane, është e nevojshme ruajtja dhe zhvillimi i një partneritet të qëndrueshëm me SHBA, BE dhe vendet e NATO-s;
Duke marrë në konsideratë situatën shumë të rëndë politike, ekonomike dhe shoqërore në Shqipëri gjatë qeverisjes së korruptuar të Edi Ramës, si dhe cenimin e rëndë të sistemit tonë kushtetues, pluralizmit politik të një Republike Parlamentare, ku qeveria kontrollon në mënyrë antidemokratike të gjitha pushtetet;
Duke konstatuar me shumë shqetësim braktisjen masive të vendit nga shqiptarët në tërësi dhe nga profesionistë, të rinj dhe të reja, për shkak të humbjes së shpresës dhe rrëshqitjesh së vendit drejt një qeverisje autoritare, të bazuar në korrupsionin, krimin dhe drogën, persekutime, arrestime dhe burgosje politike të liderëve të partive opozitare;
Duke vlerësuar si jetike pjesëmarrjen e diasporës në votime dhe angazhimin e tyre politik dhe qeverisës;
Duke mbajtur në konsideratë mosfunksionimin e Parlamentit dhe parlamentarizmit dhe kthimin e tij në apendiks të qeverisë, mohimin e të drejtave kushtetuese të deputetëve të opozitës në Parlament, mosrespektimin e lirive dhe të drejtave të qytetarëve dhe shkeljet flagrante të tyre nga qeveria, apo mungesën e zgjedhjeve të lira dhe të ndershme, për shkak të përdorimit të shtetit për interesa politike, përdorimin e grupeve kriminale për blerjen e votave dhe intimidimin e votuesve;
Duke qenë të ndërgjegjshëm mbi nevojën për rikthimin e pluralizmit dhe demokracisë funksionale, krijimit të shpresës dhe besimit tek qytetarët, dhe nevojën që opozita të ngrihet në përgjegjësitë e saj, për të mbrojtur dhe përfaqësuar interesat e shqiptarëve, përmes një politike që tejkalon debatin rreth liderëve politikë, por që bashkohet rreth ideve me interes kombëtar, mundësimin e Integrimit Europian dhe një demokraci Institucionale;
DEKLAROJMË SA MË POSHTË:
1. Institucionalizimin e Federatës së Opozitës së Bashkuar, sipas parimit “Edhe pse të ndryshëm, kemi një qëllim të përbashkët, ndërtimin e një Shqipërie Europiane”, ku përfshihen të gjithë faktorët politikë parlamentarë dhe relevant opozitarë, të cilët marrëdhënien dhe bashkëpunimin opozitar, e çmojnë si detyrim dhe jo marrëveshje që fuqizojnë qeverinë dhe antikushtetutshmërinë.