Blinken: Reforma në drejtësi është thelbësore për integrimin në BE

“Institucionet e reja të drejtësisë të veprojnë me guxim ndaj pandëshkueshmërisë” Ambasada e SBA: Mbështetja jonë, e palëkundur

Pas largimit nga Shqipëria, Sekretari amerikan i Shtetit Antony Blinken ka postuar një foto nga takimi i zhvilluar me përfaqësuesit e drejtësisë, duke dhënë mesazhin se reforma në drejtësi është thelbësore për vendin tonë.

“Reforma në drejtësi është thelbësore për Shqipërinë dhe përpjekjet e saj për integrim në BE. U takova me drejtuesit e reformës në drejtësi në Tiranë për të përgëzuar progresin e tyre në avancimin e shtetit të së drejtës dhe luftimin e korrupsionit”,-shkroi sekretari Blinken në X. Këto foto i postoi edhe ambasada amerikane në Tiranë që theksoi se Sekretari i Shtetit Antony Blinken përsëriti angazhimin e qëndrueshëm të Shteteve të Bashkuara për reformën në drejtësi në Shqipëri gjatë takimit me krerët e drejtësisë. Ambasada amerikane në Tiranë, ka shprehur mbështetjen e SHBA-së për reformën në drejtësi. Mesazhi vjen pas vizitës së djeshme të Blinken në Tiranë. Ambasada shkruan se megjithëse reforma nuk është as e shpejtë, as e përsosur, as e lehtë, ky është momenti që institucionet e reja të drejtësisë të veprojnë me guxim ndaj pandëshkueshmërisë dhe të nxisin besimin e publikut në sundimin e ligjit. “Sekretari Blinken ritheksoi angazhimin e qëndrueshëm të Shteteve të Bashkuara për reformën në drejtësi në Shqipëri gjatë një takimi me krerët e drejtësisë sot (dje). Edhe pse reforma nuk është as e shpejtë, as e përsosur, as e lehtë, ky është momenti që institucionet e reja të drejtësisë të veprojnë me guxim ndaj pandëshkueshmërisë dhe të nxisin besimin e publikut në sundimin e ligjit. Këto sfida janë të mëdha, por Shtetet e Bashkuara qëndrojnë fort pas këtyre institucioneve dhe do të mbeten të palëkundura në mbështetjen tonë”,-thuhet në mesazh. Sekretari i Shtetit i SHBA Antony Blinken u takua me Presidentin e Shqipërisë Bajram Begaj, Kryeministrin Edi Rama dhe anëtarë të qeverisë gjatë vizitës së tij historike në Shqipëri dje. Sekretari Blinken pohoi se Shqipëria është kryesore në përballimin e kaq shumë prej sfidave me të cilat përballemi dhe se ne mund t’i përballojmë në mënyrë më efektive së bashku. Sekretari falënderoi Shqipërinë për mikpritjen e saj ndaj afganëve, mbështetjen e saj për Ukrainën në Këshillin e Sigurimit të Kombeve të Bashkuara dhe për mbështetjen e saj për Ukrainën kundër pushtimit të tmerrshëm dhe të paprovokuar të Rusisë. Ai vuri në dukje se lidhjet e biznesit vazhdojnë të rriten dhe diskutoi nevojën për të vazhduar forcimin e reformës së pavarur në drejtësi si pjesë thelbësore e nxitjes së rritjes ekonomike dhe përpjekjeve për pranimin në BE. Në përfundim të udhëtimit, Sekretari dhe ministri i Jashtëm Igli Hasani nënshkruan dy marrëveshje bashkëpunimi, për kornizën kundër manipulimit të informacionit të shtetit të huaj dhe për programin e shkëmbimit akademik Fulbright. Sekretari i Shtetit i SHBA Antony Blinken iu bashkua festës së ambasadës për të rinjtë shqiptarë gjatë vizitës së tij. Anëtarja e Këshillit Rinor të ambasadës Fiori Hoxhaj i uroi mirëseardhjen Sekretarit dhe rrëfeu rrugëtimin e saj të jashtëzakonshëm nga Tropoja dhe ndikimin që vullnetarët e Korpusit të Paqes kanë pasur në jetën e saj. Sekretari Blinken shprehu vlerësimin e tij për pritjen e ngrohtë që iu bë në “tokën e shqiponjave” gjatë vizitës së tij në Tiranë. Nga Dua Lipa, te Mira Murati, te kombëtarja shqiptare e futbollit, te restorantet e Nju Jorkut që shërbejnë tavë dheu, ai vuri në dukje se imazhi i mirë i Shqipërisë vazhdon të rritet, udhëhequr nga përpjekjet e të rinjve të saj të talentuar.

Kryeministri Edi Rama është takuar me homologun e tij në Maqedoninë e Veriut, gjatë pjesëmarrjes në Konferencën e Sigurisë në Mynih. Në një postim në rrjetet sociale, Edi Rama shfaqet në krah të Xhaferrit, teksa shprehet se patën së bashku një bashkëbisedimi vëllazëror mbi sfidat e përbashkëta dhe programit të dy samiteve të fundshkurtit në Tiranë, për Ukrainën si edhe për Planin e Ri Ekonomik Europian të Rritjes. “Me mikun tim Talat Xhaferri, pas një bashkëbisedimi vëllazëror mbi sfidat e përbashkëta dhe programit të dy samiteve të fundshkurtit në Tiranë, për Ukrainën si edhe për Planin e Ri Ekonomik Europian të Rritjes”, shkruan Rama.