Kontratat e përfunduara në vitin 2023, APP: Institucionet të raportojnë ecurinë e zbatimit
Agjencia e Prokurimit Publik u ka kërkuar institucioneve që të respektojnë kërkesat ligjore për raportimin që duhet të bëhet nga ana e tyre për ecurinë e zbatimit të kontratave që kanë përfunduar në 2023. Në një shkresë drejtuar këtyre autoriteteve, APP nënvizon detyrimet që kanë këto autoritete. “Agjencia e Prokurimit Publik sjell në vëmendje të autoriteteve/ enteve kontraktore që, në zbatim të nenit 124, pika 1, të Ligjit nr. 162, datë 23.12.2020 “Për Prokurimin Publik”, kanë detyrimin të ndjekin zbatimin e kontratës sipas kushteve në bazë të të cilave është nënshkruar, për të garantuar se ajo zbatohet në kohën, cilësinë dhe vlerën e përcaktuar, në përputhje me kushtet e përcaktuara në dokumentet e tenderit dhe me legjislacionin në fuqi. Gjithashtu, në zbatim të nenit 125, pika 2 dhe 3, të LPP, si dhe nenit 107, pika 5 dhe 6, të Vendimit të Këshillit të Ministrave Nr. 285, date 19.05.2021, “Për Miratimin e Rregullave të Prokurimit Publik”, i ndryshuar, autoritetet/entet kontraktore kanë detyrimin të raportojnë pranë APP për ecurinë e zbatimit të kontratës, nëpërmjet formularit të raportimit, i cili duhet të dërgohet brenda 30 ditëve nga përfundimi i kontratës. Sa më sipër, sjellim në vëmendje respektimin me rigorozitet të detyrimit ligjor për dërgimin e formularëve të raportimit për zbatimin e të gjitha kontratave të lidhura nga autoritetet/entet kontraktore, afati i të cilave ka përfunduar përgjatë vitit 2023, duke pasqyruar ecurinë e zbatimit të tyre. Gjithashtu, në rast të mospërfundimit të zbatimit të kontratës brenda afatit të parashikuar, AK duhet të dërgojë pranë APP formularin e raportimit të ndërmjetëm, ku të pasqyrojnë arsyet e mosrealizimit të kontratës brenda afatit të parashikuar dhe masat e marra në këtë drejtim” vlerëson APP. Ky institucion gjithashtu nënvizon se raportimi nga institucionet duhet të bëhet sipas formularit standard të miratuar me Udhëzimin Nr. 2, datë 18.03.2022 “Mbi Raportimin e Zbatimit të Kontratës”, i cili mund të dërgohet edhe në rrugë elektronike pranë APP./ MONITOR