Rama vizitë në Ankara, Erdogan i kërkon: Pastroni mbetjet e FETO-s

Presidenti turk i kërkon fund strukturave të Gylenit në Shqipëri “Duan të hedhin hije në marrëdhëniet tona”

Me ftesë të presidentit turk Erdogan, kryeministri Edi Rama ndodhet në një vizitë zyrtare në Ankara. Në deklaratën e përbashkët të Kryeministrit Edi Rama dhe presidenti Erdgoan u premtua thellimi i bashkëpunimit dhe forcimi i marrëdhënieve mes dy vendeve.

‘Përforcuam bazën juridike të bashkëpunimit tonë. Volumi tregtar ka arritur në 1 miliardë dollarë, objektivi ynë është ta çojmë në 2 miliardë dollarë. Kam besim se do t’ia arrijmë në një kohë shumë të shkurtër’,-tha Erdogan.

Erdogan premtoi se do të qëndrojë krah Shqipërisë ndërsa këmbëngul sërish tek ajo që e quan ‘pastrimi i mbetjeve të fundit të organizatës FETO”, të klerikut Fetullah Gylen, të cilën Ankaraja e akuzon për veprimtari terroriste dhe si përgjegjëse të grushtit të dështuar të shtetit në vitin 2016.

Pjesë e agjendës sonë ishte dhe pastrimi i mbetjeve të FETO-s e cila vijon aktivitetet e saj me qëllim për t’i hedhur hije marrëdhënieve tona. Ne nuk do ta lejojmë që të arrihet. Edhe autoritetet shqiptare janë të vetëdijshme me këtë. Lufta jonë me këtë strukturë do të vijojë.

Gjithashtu Erdogan tha se janë të vendosur për të thelluar dhe bashkëpunimin në fushën e industrisë së mbrojtjes dhe ushtarake me Shqipërinë. Ndalesa e parë e kryeministrit Edi Rama ishte Anitkabir, Mauzoleumin e “Mustafa Kemal Atatürk” për të nderuar figurën e reformatorit të madh, lider i Luftës Turke për Pavarësi, si dhe themelues e President i parë i Republikës së Turqisë. Më pas erdhi dhe pritja zyrtare me nderime shtetërore nga Presidenti Erdogan. Në kuadër të forcimit të mëtejshëm të bashkëpunimit mes Turqisë dhe Shqipërisë u nënshkruan disa marrëveshje dhe memorandume mirëkuptimi dypalëshe në fushën e mjedisit, mbrojtjes, të medias dhe komunikimit, etj. Kryeministri Rama dhe Presidenti turk Recep Tayyip Erdogan do të drejtojnë mbledhjen e Këshillit të Bashkëpunimit Strategjik TurqiShqipëri që u krijua më 6 janar 2021. Në nisje të mbledhjes, ku pjesëmarrës janë dhe disa prej ministrave të kabineteve qeveritare respektive, Kryeministri Rama do të adresohet me një fjalë. Së bashku me Kryeministrin Rama pjesë e delegacionit qeveritar do të jenë dhe zv/Kryeministrja, ministri i Jashtëm Igli Hasani; ministri i Mbrojtjes Niko Peleshi; ministrja e Bujqësisë Anila Denaj; ministrja e Shëndetësisë Albana Koçiu; ministrja e Arsimit Ogerta Manastirliu; si dhe ministrja e Turizmit Mirela Kumbaro.