Deklarata ‘bombë’ e Macron: Trupat e NATO-s mund të futen në Ukrainë
Shefi i NATO-s thotë se Aleanca nuk ka plane për dërgimin e trupave në Ukrainë “Trupa në terren? Nuk përjashtohet në të ardhmen”
FRANCË – Dërgimi i trupave perëndimore në terren në Ukrainë nuk duhet të përjashtohet në të ardhmen. Kështu tha presidenti francez Emmanuel Macron të hënën në mbrëmje. “Një deklaratë jashtëzakonisht e saktë dhe jashtëzakonisht e rrallë, në Europë nuk ishte dëgjuar asnjëherë një fazë e tillë, as verbalisht”, tha të martën më 27 shkurt, Peer De Jong, nënkryetar i institutit Themiis, specialist në gjeopolitikë dhe ish-kolonel i trupat detare. “Një fjali tronditëse”,-shtoi ai. “Është një angazhim jashtëzakonisht i fortë dhe i adresuar qartë ndaj rusëve”, vazhdon të shpjegojë specialisti ushtarak. Kjo çështje e dërgimit të trupave tokësore është një nga opsionet. “Nëse të tjerët pohuan se nuk kishte konsensus për çështjen e dërgimit të trupave ushtarake në Ukrainë, presidenti francez vazhdoi të rikonfirmonte një formë vendosmërie në lidhje me ofensivën ruse”,-nënvizon Peer De Jong.
“Sot, nuk ka fare plan për dërgimin e trupave tokësore në Ukrainë, veçanërisht pasi 27 vendet duhet të bien dakord”,- tha nënkryetari i institutit Themiis. Emmanuel Macron po përpiqet të pozicionohet në ballë të mbështetjes për Kievin. “Ne shohim se Franca po merr drejtimin e situatës, për të ofruar mbrojtje në Europë”,thotë specialisti. “Presidenti Macron padyshim dëshiron të shfaqet si një lloj organizatori në betejën antiMoskë, që kur Rusia ka pushtuar Ukrainën”,-përfundon ai. Sekretari i Përgjithshëm i NATO-s, Jens Stoltenberg tha se Aleanca nuk ka në plan të dërgojë trupa në Ukrainë, ndërsa disa vende Perëndimore mendohet se po shqyrtojnë dërgimin në terren të forcave ushtarake. I pyetur nga agjencia e lajmeve “The Associated Press” mbi mundësinë e dërgimit të forcave perëndimore, zoti Stoltenberg tha se “nuk ka plane për dërgimin e trupave luftarake të NATO-s në Ukrainë”. Kryeministri i Sllovakisë, Robert Fico tha se disa vende po shqyrtojnë mundësinë, nëse duhet të arrijnë marrëveshje dypalëshe me Ukrainën për të dërguar trupa, për ta ndihmuar vendin të përballet me agresion rus. Zoti Fico nuk dha detaje të mëtejshme, por tha se qeveria e tij nuk planifikonte të dërgonte ushtarë. Edhe Republika
çeke e përjashtoi këtë mundësi.
Shefi i NATO-s, i tha, gjithashtu, agjencisë “The Associated Press” se “ajo që po ndodh është agresion i Rusisë ndaj Ukrainës, në shkelje të ligjeve ndërkombëtare. Sipas parimeve ndërkombëtare, Ukraina ka të drejtë të vetë-mbrohet dhe ne kemi të drejtën ta mbështesim atë në mbrojtjen e kësaj të drejte”.
NATO-ja si aleancë nuk e furnizon Ukrainën me mjete luftarake, por e mbështet me pajisje mjekësore, uniforma dhe pajisje për periudhën e dimrit. Por disa vende anëtare të NATO-s kanë dërguar armë dhe municione përmes marrëveshjeve bilaterale, apo shumëpalëshe. Çdo vendim që NATO-ja të dërgojë trupa duhet të mbështetet në mënyrë të njëzëshme nga të gjitha vendet anëtare. Presidenti i Francës, Emmanuel Macron tha të hënën se dërgimi i trupave perëndimore në Ukrainë nuk duhet “përjashtuar” në të ardhmen, ndërsa po shënohet viti i tretë i sulmit në shkallë të gjerë nga Rusia. “Duhet të bëjmë gjithçka që është e nevojshme që Rusia të mos e fitojë këtë luftë”,-tha udhëheqësi i Francës, gjatë një takimi në Paris. Ndërsa nënvizoi se “tani për tani nuk ka konsensus” për dërgimin e trupave, ai tha se “asnjë mundësi nuk duhet përjashtuar”. Ideja për dërgimin e trupave në terren, ka qenë një tabu deri më tani, veçanërisht pasi NATO-ja synon të shmangë përfshirjen në shkallë më të gjerë në luftë me Rusinë e armatosur me armë bërthamore. Kremlini paralajmëroi sot se konflikti mes Rusisë dhe NATOs së udhëhequr nga Shtetet e Bashkuara, do të ishte i pashmangshëm nëse vendet e NATO-s do të dërgonin trupa për të luftuar në Ukrainë.