Obligacionet 15-vjeçare/ Banka e Shqipërisë: Yield-i ulet lehtë në 7.94 për qind

Ministria e Financave zhvilloi të hënën ankandin e ri të obligacioneve 15-vjeçare. Sipas të dhënave nga Banka e Shqipërisë, në ankand u paraqitën kërkesa totale në vlerën e afërsisht 2.26 miliardë lekëve, nga 2 miliardë lekë që kishte qenë shuma e shpallur për financim.

Në fund, Ministria e Financave vendosi të pranojë kërkesa për vlerën totale të 1.835 miliardë lekëve. Yield-i uniform i pranuar dhe kuponi i obligacionit rezultoi 7.94%, nga 7.98% që kishte qenë yield-i i ankandit të mëparshëm, (që ishte zhvilluar në tetor të vitit të kaluar), por ndjeshëm më i lartë se kuponi indikativ prej 7.3%, i paraqitur nga Ministria e Financave para ankandit. Megjithatë, rënia e lehtë e lehtë e yield-it shpjegohet me uljen e shumës së emetimit nga Ministria e Financave. Në rast se do të ishin pranuar kërkesa për shumën e plotë, prej dy miliardë lekësh, yield-i uniform i emetimit do të rezultonte më i lartë. Yield-i maksimal i kërkesave të paraqitura nga investitorët në ankand arriti deri në 11%, ndërsa yield-i minimal i kërkuar ishte vetëm 5.5%. Diferencat tejet të mëdha mes yield-it minimal dhe atij maksimal të kërkuar nga investitorët janë, mes të tjerash, një tregues i mosfunksionimit të një tregu dytësor likuid dhe transparent. Sidoqoftë, yieldet e obligacioneve të qeverisë shqiptare vazhdojnë të ofrojnë kthime mjaft joshëse dhe në vazhdimësi pjesëmarrja në ankandet e titujeve afatgjatë është e konsiderueshme. Përveç investitorëve tipikë institucionalë vendas, si bankat apo fondet e pensionit, kthimet e larta nga këto instrumente në vitet e fundit kanë tërhequr edhe një numër në rritje individësh. Ndërkohë, sipas burimeve nga tregu, në vitet e fundit ka pasur shfaqje interesi edhe nga investitorë të huaj për të investuar në letrat me vlerë të qeverisë shqiptare. Hapja e tregut të bonove dhe obligacioneve për një bazë më të gjerë investitorësh, sipas ekspertëve, do të ishte një ndër parakushtet themelore për të mundësuar një zhvillim të mirëfilltë të tregut dytësor të titujve qeveritarë në Shqipëri. Qeveria shqiptare ka nisur emetimin e obligacioneve 15vjeçare që nga viti 2021. Prej atëherë, janë zhvilluar gjithsej 10 ankande të këtyre instrumenteve, për një shumë totale të emetuar prej afërsisht 13.8 miliardë lekësh. Të dhënat e para të këtij viti kanë zbehur, të paktën për momentin, pritshmëritë për një rritje të afërt të normave të interesit. Inflacioni në muajin janar zbriti në 3.4%, ndërsa inflacioni bazë (që përjashton çmimet e produkteve ushqimore dhe energjetike) zbriti në 2.9%. Më datë 7 shkurt, Banka e Shqipërisë vendosi të mbajë të pandryshuar normën bazë të interesit në 3.25%. Megjithatë, vetë Banka e Shqipërisë në raportin e fundit të politikës monetare vlerësonte se presionet e brendshme inflacioniste ngelen të larta. Rritja e pagave në sektorin publik, në mesin e këtij viti, por edhe një kërkesë e rritur nga turizmi, mund të forcojnë presionet inflacioniste pas tremujorit të dytë të vitit./ MONITOR