Samiti/ Nënshkruhet marrëveshja për shtëpinë e re të Kolegjit të Europës që do të hapë dyert në Tiranë

Rama: Destinacion i mirëfilltë europian arsimimi. Kënaqësi që t’i ofrojmë shtetësinë shqiptare Mogherinit Rektorja Mogherini: Viti i ri akademik nis në shtator. Komisionieri Varhelyi: Do të ndryshojë jeta ekonomike në Ballkan

Në kuadër të Samitit Rajonal mbi Planin e Rritjes dhe Konvergjencës, u nënshkrua dje marrëveshja mes Kolegjit të Europës, Ministrisë së Arsimit dhe Universitetit të Tiranës për shtëpinë e re të Kolegjit të Europës që do të hapë dyert në Tiranë dhe do të garantojë funksionimin e plotë të Kolegjit, duke nisur që prej këtij viti akademik deri në përfundimin e kampusit të ri. Marrëveshja u nënshkrua nga Ministrja e Arsimit dhe Sportit, Ogerta Manastirliu, Rektori i Universitetit të Tiranës, Artan Hoxha dhe Rektorja e Kolegjit të Europës, Federica Mogherini, në prani të kryeministrit Edi Rama dhe Komisionerit të BE për Zgjerimin dhe Fqinjësinë, Oliver Varhelyi. Rektorja e Kolegjit të Europës, Federica Mogherini u shpreh se ka pasur një interes shumë të lartë nga ana e të rinjve për të zhvilluar studimet në këtë Kolegj: “Viti akademik do të nisë në shtator me 31 studentë, me një program të nivelit master për transformimin dhe integrimin europian me fokus të veçantë në Bashkimin Europian dhe Ballkanin Perëndimor. Çelëm procesin e pranimit në tetor dhe sot mund të raportoj se kemi marrë 241 aplikime, për 31 vende, nga 41 kombësi, nga i gjithë rajoni, nga vendet e BE-së dhe 15 të tjera”, – u shpreh ajo. Kolegji i Europës hap një horizont të ri edukimi për të rinjtë shqiptarë dhe jo vetëm, ai ngre në një tjetër nivel sfidën për ndërkombëtarizimin e universiteteve tona, duke krijuar ndër të tjera mundësinë për një mësim më të thelluar për vetë Bashkimin Europian dhe rrugëtimin drejt tij. Shtëpia e re e Kolegjit në Tiranë do të jenë ambientet e siguruara nga Universiteti i Tiranës, në një ndërtesë të quajtur “Liria”, një simbolikë e veçantë kjo. “Është një ndërtesë historike, ku studentët shqiptarë bënë historinë dhe nisën rrugëtimin drejt lirisë dhe demokracisë”- tha Manastirliu. Rektorja Mogherini foli për një histori sukses ndërsa u shpreh edhe më optimiste për të ardhmen. “Brenda 5 muajve do të kemi një histori të konsoliduar suksesi. Ky është vetëm fillimi, po presim të gjithë të bashkëpunojmë ngushtë”,tha Rektorja.

Edhe Komisioneri Varhelyi ka folur në lidhje me kompusin që do të ndërtohet në Tiranë nga kolegji i Europës. Ai tha se kjo do të ndihmojë që Tirana të bëhet edhe më popullore, ndërsa ka shtuar se kjo do të ndryshojë jetën ekonomike në Ballkan. “Kolegji i Europës është duke hapur kampusin e tij në Tiranë për të nisur vitin akademik në shtator, me 31 studentët e parë nga gjithë Europa. Nuk kam përgatitur fjalë, por jam i befasuar nga shifrat, Tirana do të bëhet edhe më popullore se Bryzhi. Ai që do të ndërtohet edhe nga pikëpamja arkitekturore do të jetë diçka që do të ndryshojë edhe jetën ekonomike në Ballkan. BE ka mbërritur në Tiranë!”,-tha ai. Ndërkohë, kryeministri Edi Rama foli në lidhje me kampusin e kolegjit të Europës që do të hapet në Tiranë. Në fjalën e tij, Rama tha se është një destinacion i mirëfilltë arsimimi evropian, ndërsa shprehu vlerësim për Federica Mogherinin. “Dua të ndaj me të gjithë ju shprehjen e mirënjohjes më të thellë për Federikën, e cila po ndjek projektin hap pas hapi dhe nga ana tjetër, nuk e fsheh dot kënaqësinë që të kemi Federica Mogherinin, që i afrohet asaj pike nuk ne ofrojmë nënshtetësinë shqiptare. Do të jetë më shumë sesa nder që ta konsiderojmë atë një qytetarë shqiptare. Lidhur me numrin e madh nga të rinjve nga vendet anëtare të BE që duan të vijnë në BE ndoshta tregon se të vish në Shqipëri

nga BE mund të jetë më entuziazmuese se të shkosh nga BE në BE, ndaj besoj se kemi këtë numër kaq të madh. Dua të falënderoj delegacionin BE këtu dhe Varhelyi, i cili ka punuar gjatë gjithë kohës në 360 gradë me ne për t’u siguruar që në të gjitha frontet të bëhen gjëra sa më të prekshme dhe sa më realizueshme në rajon. Edhe ardhja e kolegjit na bën krenar ndaj po bëjmë përpjekje për të pasur një ndërtesë ikonë dhe për ta pasur një destinacion të mirëfilltë evropian arsimimi jo vetëm për program, por edhe aspektit pamor, cilësisë së jetës për studentët nga auditoret deri tek fjetoret, edhe pse në Tiranë të rinjtë flenë gjithmonë e më pak, sepse jeta e argëtimi është më tërheqëse”,-u shpreh Rama.