Alibeaj thumbon grupin e Bardhit: Askush s’mund të flasë në emër të PD
Korreshi publikon foton e Alibeajt: Pazaret i bëjnë në kafe, i shërbejnë si zar Ramës Negociatat për dhënien fund të kaosit në Kuvend
Sekretari i Përgjithshëm i PD, Enkelejd Alibeaj, ka reaguar në lidhje me një lajm ekskluziv të BalkanWeb, ku gazetari Osman Stafa, duke cituar burime të tij, deklaronte se kanë nisur negociata mes mazhorancës dhe opozitës për arritjen e një normaliteti në jetën parlamentare. Me anë të një postimi në Facebook, Alibeaj u shpreh se Partia Socialiste duhet të sqarojë nëse ka vendosur që të bëjë pazar për reformën zgjedhore. Ai ka vijuar duke u shprehur se në emër të PD nuk mund të flasë asnjë kandidat apo i dëshirueshëm i Edi Ramës.
POSTIMI
Dy sqarime që duhet të dijë publiku për negociatat sekrete apo marrëveshjet okulte të përfolura në media:
PS duhet të sqarojë nëse ka vendosur të bëjë pazare për reformën zgjedhore. Në mediat referuar burimeve nga PS dhe grupit të Sali Berishës, është bërë e ditur se ka një marrëveshje për të dështuar Komisionin e Reformës Zgjedhore në mënyrë që çështja të kalojë në Komisionin e Ligjeve ku socialistët kanë vendimin me shumicë votash dhe veçanërisht ku opozitës i mohohet dhe e drejta e vetos, si garanci që PS nuk do të bëjë një ligj elektoral të njëanshëm duke peshkuar votat e opozitës. Dihet se janë kundër votimit të diasporës, votimit elektronik, listave të hapura, zonës zgjedhore. Nëse kjo është e vërtetë, ky është një pazar në kurriz të shqiptarëve dhe në interes të dy individëve që duan të mbajnë peng Shqipërinë, Rama dhe Berisha.
Asnjë kandidat apo i dëshirueshëm i Edi Ramës nuk mund të flasë në emër të PD. Prej disa ditësh ka raportuar se në mesin e politikanëve po përflitet se Partia Socialiste është duke negociuar në sekret të plotë me PD-në zyrtare të Lulzim Bashës. PD e Bashës ka hedhur poshtë zërat, duke reaguar dje, pasi lajmi u publikua. Ndërsa, gjatë ditës së sotme, ishte ministrja e mazhorancës Elisa Spiropali, e cila deklaroi se PS nuk ka përse të negociojë me opozitën për një reformë zgjedhore, që ajo tha se është publike.
Në lidhje me këto zhvillime, deputeti i Partisë Demokratike Saimir Koreshi ka ironizuar Alibeajn. Ai ka publikuar një foto të Alibeajt në kafe, me një person tjetër që është duke u larguar, që pretendohet se është përfaqësues i PS-së.
Postimi i deputetit Saimir Koreshi
Pazaret bëhen kafeve e restoranteve, duke dhënë besën që do të mbajmë peng bashkërisht reformën zgjedhore, duke i shërbyer si zar Edi Ramës. Nëse nga dialogu në institucione sheh se po humb rolin e zarit që mban peng opozitën, shqetësohesh dhe s’di çfarë flet, quan “pazar” kontrollin parlamentar ndaj Edi Ramës, quan “pazar” heqjen e mundësisë për bllokimin e reformës zgjedhore. Pastaj zgjohesh dhe i fut edhe një status: Jam dhe ndjehem “Princ i Spanjës”! Askush nuk mund të flas në emër të “Spanjë”.