“Rama do të diktojë opozitën”, Meta: Berisha dhe Beleri, goditje politike
Meta: Qeveria ka vjedhur paratë e pensionistëve për rrugë “të florinjta” që rrëzohen “Nuk kanë gojë të flasin ata për Berishën”
Kreu i Partisë së Lirisë Ilir Meta ka deklaruar për gazetarët pas përfundimit të takimit me degën e PL në Fier se vendimet e drejtësisë ndaj Fredi Belerit dhe Sali Berishës janë goditje politike të urdhëruara nga kryeministri Edi Rama. Meta u shpreh se kreu i qeverisë synon izolimin e Berishës me shpresën për të diktuar dinamikën brenda kampit opozitar dhe për të nxitur përçarjen. Megjithatë, sipas tij protesta e ka dhënë një mesazh të fuqishëm dhe “Përpjekjet e tij për të shkatërruar pluralizmin politik janë të pashpresa”.
“Ju e dini se pak ditë më parë u mor një vendim tepër absurd siç ka qenë gjithë procesi ndaj zotit Beleri. Sa i takon Berishës kam thënë më parë që kjo është një goditje politike e urdhëruar nga Edi Rama dhe që synon izolimin e tij me shpresën për të diktuar dinamikën brenda kampit opozitar dhe për të nxitur përçarjen, por mitingu i 20 shkurtit ka dhënë një mesazh të fuqishëm dhe përpjekjet e tij për të shkatërruar pluralizmin politik janë të pashpresa. Shumë shpejt do të rivendoset rendi kushtetues në vend”,-u shpreh Meta.
Kryetari i Partisë së Lirisë, Ilir Meta zhvilloi ditën e sotme një takim me strukturat e PL në qarkun e Fierit nga ku ngriti shqetësimin e mungesës së investimeve në shumë fusha të jetës, duke u ndalur tek pensionistët. Sipas tij, qeveria socialiste ka vjedhur pensionistët dhe me ato para kanë bërë PPP për rrugë “të florinjta” që shkatërrohen. Kreu i PL tha se “duhet të çmontohet ky sekt nga pushteti” dhe për këtë duhet të takojnë çdo pensionist për t’i prezantuar atyre programin e Partisë së Lirisë.
“Ndaj duam pensione që të jetojnë prindërit tanë me dinjitet dhe mos varen nga ndihma e fëmijëve. Kemi vetëm një rrugë, të çmontojmë këtë sekt nga pushteti. Për këtë duhet të takojmë çdo pensionist të Shqipërisë dhe ti sqarojmë programin tonë për pensionet. Mos u shqetësoni po të thonë ata jo po pensioni aq, Berisha aq. Nuk kanë gojë të flasin ata për Berishën. Nuk ka krahasim nga 2005-2013 me rritjen deri në 2023.
Qeveria ka shkelur edhe ligjet ekzistuese. 70-80 mijë lekë në muaj çdo pensionisti në zonat urbane, rreth 3040 mijë lekë në muaj, pra rreth 400 mijë lekë në vit ia ka borxh çdo pensionisti në zonat rurale kjo qeveri. Këto lekë janë marrë për të bërë PPP ato rrugët që i keni parë që rrëzohen, rrugët “e florinjta” që janë 5-6 herë më të shtrenjta sesa në Malin e Zi”,-tha Meta mes të tjerash.
TIRANË – Kryetari i Partisë Drejtësi, Integrim dhe Unitet (PDIU) Shpëtim Idrizi, i ftuar në rubrikën “Opinion” në “News 24”, duke komentuar dënimin e kryetarit të zgjedhur të Himarës Fredi Beleri nga SPAK, deklaroi se Struktura e Posaçme duhet ta hetojë atë për disa akuza. Idrizi u shpreh se Beleri po përdoret si ‘kalë Troje’ nga Greqia, për të sulmuar Shqipërinë. “Për ne Fredi Beleri është një ekstremist, e duhet të hetohet për pjesëmarrjen e tij në masakrën e Peshkëpisë, që është dënuar për armëmbajtje pa leje, që është dënuar për djegie të simboleve kombëtare, nga gjykatat shqiptare. I kemi bërë thirrje SPAK që Beleri të hetohet për akuza të tjera. Për këtë çështje na vijnë përfaqësues të Greqisë, të cilët nga ana tjetër shtypin të drejtat e të burgosurve në vendin fqinj. Asnjë nga këta nuk kujtohet të thotë që të hiqet ligji i luftës. Beleri u zgjodh me kast, që të kthehet në kalë troje për Greqinë. Edhe pse Beleri ka shumë rekorde penale, sërish Athina e përdor për të sulmuar Shqipërinë. I qajnë hallin Fredi Belerit, për një njeri që është përsëritës i veprave penale. Kur ata thonë se pushteti ka interes që të marrë prona në Himarë, duhet të përmendin emra. Politika shqiptare duhet ta thyejë heshtjen për shqiptarët e Çamërisë”,tha Idrizi. I pyetur se cili është mendimi i tij për negociatat mes mazhorancës dhe opozitës që të nisë një jetë normale parlamentare, Idrizi tha se çdo gjë që i shërben dialogut, por edhe bashkimit, është pozitive.
“Unë përshëndes mbajtjen e mbledhjes së Kryesisë së Rithemelimit. Ky është një hap i rëndësishëm për opozitën e vendit. Partia Demokratike duhet të kthehet më e fortë. Ky do të ishte një lajm i mirë për opozitën në vend, por edhe për Shqipërinë. Opozita prej kohësh në ngërç, e mbështet bashkimin. Bashkimet janë gjithmonë të mira dhe unë uroj që palët të gjejnë kompromise, me qëllim që dhe jeta parlamentare të kthehet në normalitet. Rithemelimi duhet të thotë se çfarë qëndrimi ka për Zgjedhoren, për listat e hapura etj. Unë druaj se dy partitë e mëdha nuk duan ndryshimin”,-deklaroi Idrizi.