Do të shtohen të penduarit e drejtësisë/ Mbyllet 41 biss tek 313, SPAK do të strehojë bashkëpunëtorët e drejtësisë

TIRANË - Autoritetet e drejtësisë po bëhen gati të kenë më tepër të penduar dhe bashkëpunëtorë drejtësie. Për këtë arsye regjimi i ashpër që gjendet brenda 313 është mbyllur për t’u përshtatur për vendin ku do të mbahen të penduarit e drejtësisë. Një burim zyrtar i TCH bëri me dije se mbas mbylljes së 41 biss-it në Tiranë, funksional do të vijojë të jetë vetëm një regjim i ngjashëm që ndodhet në burgun e sigurisë së lartë në Peqin. Kapaciteti i 41 biss-it të Peqinit është për 40 të burgosur, ndërkohë që të gjitha qelitë e 41 biss-it të mëparshëm në kryeqytet janë kthyer në burgun e bashkëpunëtorëve të drejtësisë. Në ambientet e godinës që u promovua ku do të mbaheshin njerëzit e krimit të organizuar që japin urdhra nga qelia, janë zhvendosur të arrestuarit që kanë statusin e të penduarit dhe që kanë folur apo po flasin për llogari të hetimeve të drejtuara nga SPAK. Ky ndryshim sipas të njëjtave burime është bërë për të garantuar siguri absolute të jetës së të penduarve dhe njëherazi transport efikas dhe të menjëhershëm, për çdo rast kur prokurorët çmojnë pyetjen e tyre. Meqenëse godina e 313 lidhet me tunel nëntokësor me

Gjykatën e Posaçme, ky element është konsideruar si masë e domosdoshme.

Për momentin në burgun e të penduarve mbahen tetë dëshmitarë drejtësie, ndërsa 3 të tjerë mbahen në një burg tjetër. Regjimi i ashpër kopje e modelit Italian, hapi dyert gjatë kohës kur ministria e drejtësisë drejtohej nga Etilda Gjoni dhe ishte llogaritur që të mbikëqyresh me rregulla të forta gati 200 të burgosur. Por ndonëse ishte kryer një parashikim i tillë, aktualisht në 41 biss janë vetëm Sokol Mjacaj dhe Ilir Kupa, edhe ata nën gjykim mbasi e kundërshtojnë regjimin në Gjykatën e Posaçme.