Dosja e “21 janarit” i kalon SPAK-ut për hetim, Gjykata e Lartë pranon kërkesën e familjarëve të Aleks Nikës

Gjykata urdhëron Prokurorinë të regjistrojë procedimin penal për Berishën, Bashën e Ndrea Prendin Avokati: Edhe Strasburgu konfirmoi se është vrasje shtetërore. Prokurori kundër hetimit nga SPAK: S’ka shkaqe të pranohet rekursi

Gjykata e Lartë vendo si dje që çështja e “21 janarit” t’i kalojë për hetim Prokurorisë së Posaçme kundër Korrupsionit dhe Krimit të Organizuar. Kolegji penal i Gjykatës së Lartë, pasi dëgjoi relatimet dhe mbajti parasysh vendimin e Gjykatës së Strasburgut në vitin 2023 lidhur me zgjidhjen efektive, vendosi ndryshimin e vendimit të Gjykatës së Apelit, ndryshimin e vendimit të Gjykatës së Shkallës së Parë dhe urdhëroi SPAK-un që të regjistrojë hetimet për këtë çështje. Gjykata e Lartë e quajti jo të drejtë vendimin e SPAK për të mos nisur procedimin penal. “SPAK duhej të regjistronte procedimin dhe duhej të ishte kthyer përgjigje nëse kemi elemente të veprës penale apo jo”,- argumentuan gjyqtarët. Familjarët e Aleks Nikës, i vrarë në protestën e 21 janarit të vitit 2011, kishin bërë rekurs që dosja e ’21 janarit’ t’i kalonte Prokurorisë së Posaçme. Tashmë dosja do të hetohet nga SPAK, do të ketë regjistrim të veprës penale, në fakt, familjarët e Aleks Nikës, përmes avokatëve të tyre mbrojtës, thanë se përgjegjës ishin ish-kryeministri Sali Berisha, ish-ministri i Brendshëm, Lulzim Basha dhe ish-drejtuesi i Gardës, Ndrea Prendi. “Kemi të bëjmë me një krim shtetëror. Padisim gjithë zinxhirin nga Sali Berisha tek më i vogli” tha e veja e Aleks Nikës. Seanca, cila nisi në orën 13:00, u përfshi nga debat mes gjyqtarit Sokol Binaj dhe prokurorit të Posaçëm, Alfred Shehu. Në Gjykatën e Lartë ishin të pranishëm dhe xhaxhai i Aleks Nikës, Mark Nika dhe e veja, Rajmonda Nika, si dhe përfaqësues të SPAK. Po ashtu në Gjykatën e Lartë ishin edhe dy vëllezërit e Hekuran Dedës, i vrarë në protestën e 21 janarit. Gjyqtarët Ilir Panda, Sokol Binaj dhe Sandër Simoni shqyrtuan kërkesën e familjarëve të Aleks Nikës që dosja t’i kalojë SPAK-ut. Ndërsa, SPAK përfaqësohej nga Prokurori Alfred Shehu. Gjatë seancës, avokati Idajet Beqiri, përfaqësuesi i familjes së një prej viktimave të “21 janarit”, Aleks Nika, deklaroi se shpallja e moskompetencës nga SPAK krijon një precedent të rrezikshëm. Ai tha se organi i akuzës nuk operon me shkresa, por me vendime.

DEKLARATA E AVOKATIT IDAJET BEQIRI

“Ne kemi paraqitur rekurs para jush dhe kërkojmë që në përfundim të këtij gjykimi të vendoset kalimi i çështjes pranë SPAK, sepse ka vepruar në kundërshtim me ligjin dhe ka përdorur mjete ekstra procedurale që nuk bazohen në kodin e procedurës penale. I kemi me shkrim, janë dhjetë faqe, po flas në mënyrë të përmbledhur. Kallëzimi penal ndaj personave është në kompetencë të SPAK dhe jo të prokurorisë së juridiksionit të përgjithshëm. Si viktimë krimi, paraqiten rrethanat dhe me emër e mbiemër. Ne nuk prisnim mos kompetencë që u miratua dhe nga gjykata. Ligjvënësi ka caktuar disa mënyra si konflikt kompetencash, mosfillim apo pushim çështjeje. Dhe nga pikëpamja lëndore kjo çështje i përket SPAK”, - tha avokat Idajet Beqiri

para gjykatës. Ndërkohë prokurori Alfred Shehu ka deklaruar se kallëzimi i Rajmonda Nikës ishte pa datë.

PROKURORI ALFRED SHEHU KUNDËR HETIMIT TË SPAK

Në seancën e mbajtur ditën e djeshme në Gjykatën e Lartë, përfaqësuesi i SPAK, prokurori Alfred Shehu, tha se rekursi nuk duhet të pranohet, pasi një organ tjetër kompetent është duke vijuar hetimet për vrasjen e Aleks Nikës, për identifikimin e autorëve. “Çmojmë se nuk ka shkaqe që të pranohet nga ky kolegj rekursi i bërë nga ankuesja. Nuk ka të dhëna për ekzistencën e faktit penal. Në SPAK nuk është regjistruar kallëzim penal të shtetases Rajmonda Nika. Nga verifikimi na rezultoi se Prokuroria e Tiranës kishte nisur hetimet për vrasjen e Aleks Nikës dhe Hekuran Dedës dhe plagosjen e disa personave të tjerë. Për të njëjtat vepra ishte duke hetuar edhe Prokuroria e Tiranës. Po ashtu organi i akuzës në kryeqytet në bazë të hetimit nuk ka identifikuar persona konkretë, që të konstatojë se janë kompetencë e

SPAK. Të gjendur përballë këtyre fakteve në kemi vendosur që aktet e procedimit penal të dërgoheshin në prokurorin e Tiranës. Shkresat janë vendime administrative. Janë kryer disa veprime të tjera në kuadër të këtij procesi gjyqësor. Nga prokuroria e Tiranës na thuhet se ky organ është duke kryer veprime hetimore në kuadër të procedimit të 2011. Shkresa përbën disponim të prokurorit për kalim të akteve në një organ tjetër hetimi. Nuk përbën një vendim mosfillimi. Shkresa e SPAK është një akt i paankimueshëm. Shkalla e parë dhe vendimi i Apelit duhet të lihen në fuqi. Kërkojmë mospranim të rekursit”, tha Shehu. Në gjykatën e Lartë ku u shqyrtua kërkesa e familjes Nika që dosja e vrasjes së 21 janarit të hetohet nga SPAK pati dhe një debat mes gjyqtarit të Gjykatës së Lartë, Sokol Binaj, i cili ka ngritur tonin e zërit ndaj përfaqësuesit të SPAK Alfred Shehu.

DEBATI I PLOTË NË GJYKATË

Ilir Panda: Prokuror kam dy pyetje. Siç duket nga aktet ju keni kryer dy veprime.

Cilat janë ato?

Alfred Shehu: Kemi kërkuar informacion nga Prokuroria e Tiranës.

Ilir Panda: Nën prizmin e vendimit të Gjykatës së Strasburgut, ju e shikoni ndryshe aktin e Prokurorisë së Posaçme.

Alfred Shehu: Organet duhet të bëjnë hetim të plotë. Ky procedim po kryhet nga prokuroria.

Sokol Binaj: Edhe për drejtuesit, edhe për zinxhirin drejtues kush do ta hetojë, kujt i takon.

Alfred Shehu: Po heton Tirana.

Sokol Binaj me zë të lartë: Flitet për zinxhirin drejtues, a keni përgjegjësi?!

Alfred Shehu: S’kanë dalë subjekte të posaçme.

Sokol Binaj: S’po flas për subjekte të zakonshme, zinxhirin?

Alfred Shehu: Në rast se ata gjejnë shpallin mos kompetencën dhe e sjellin.

Sokol Binaj: KPP parashikon dy mënyra disponimi të prokurorit. Ke detyrimin para një kallëzimi t’i përgjigjesh me të gjitha rekuizitat. Nuk ka rrëzohet. Nuk pranohet jep argumentet. Kjo hap rrugën

që palët të shkojnë ata ku duhet të shkojnë në lidhje me kërkesat e tyre.

Alfred Shehu: Në Kodin e Procedurës Penale nuk parashikohet.

Sokol Binaj: Jepi përgjigje. Kallëzimi vjen dhe regjistrohet.

Alfred Shehu: Ky disponim i Prokurorisë është vlerësuar edhe nga gjykata.

Sokol Binaj: Është kjo shkresë.

Alfred Shehu: Ky kallëzim nuk është regjistruar. Ai kallëzim është vlerësuar nga një prokurori tjetër.

Sokol Binaj: S’ka asnjë pengesë që për një çështje penale të hetojnë disa prokurori, një, dy, tre, katër, pesë. Por mbi bazën e regjistrimit penal dhe jo me shkresa, dërgo shkresa sa andej-këtej. Jo pa pasur asnjë mjet procedural në dorë.

Prokurori i SPAK, Alfred Shehu: I qëndrojmë argumenteve tona. Shkresa jonë është një shërbesë administrative, nuk ka ankim ndaj shkresave. Gjithashtu këto vendim i Shkallës së Parë dhe Apelit na japin të drejtë, për këto arsye kërkojmë mos pranimin e rekursit.