Arrestimi i kreut të ARRSH, Tritan Shehu: Banditizmi shtetëror po rritet me hapa galopante
TIRANË - Deputeti Tritan Shehu ka reaguar në lidhje me arrestimin e kreut të ARRSH, Evis Berberi. Në një postim në rrjetet sociale Shehu tha se kjo është një simptomë e qartë e banditizmit shtetëror që po rritet me hapa galoponte. “Shteti ka rënë në dorë të atyre që valvitin disa “pacavura” të blera apo të falsifikuara si diploma”, ka shkruar ai. “Banditizimi i shtetit, a mund të ndalet? E vështirë tashmë, me këtë “kokë përmbysje” të shtetit me banditët, vjedhësit, injorantët “lart”! Dëgjoj për arrestimin e drejtorit të “rrugëve”, një detyrë tejet e rëndësishme kjo, me përgjegjësia qindra miliona euro. Dhe kjo nuk ndodh për ndonjë gabim në detyrë, por për vepra mizerabël, të denja për ata, që vijnë nga errësira vetëm për të rrëmbyer për vete e për ata, që i emërojnë! Në një sens të vendosur në ato detyra si banditë “kamikazë”! Një rast ky i përsëritur e i përsëritur… duke filluar nga nivelet më të larta! Një simptomë e qartë kjo e “banditizimit shtetëror me rritje galopante”! Një fenomen ky që në vend që të shkonte drejt minimizimit, marginizimit, sot ka marrë dimensione katastrofale, dimensione që të bëjnë disa herë pesimist për përballjen. Sepse shteti ka rënë në dorë të atyre, që valvitin disa “paçavura” të blera apo të falsifikuara si diploma. Pa asnjë jetëshkrim, dinjitet, pa asnjë produktivitet për shoqërinë më parë.
Direkt të katapultuar në nivelet më të larta si… “Kamikazë” për të rrëmbyer. Dhe më tej për t’u “sakrifikuar” mbasi kanë shlyer haraçin e “depozituar” diku miliona, si çmim ky edhe për atë “dënim” të pritshëm. Ironi cinike kjo ndaj asaj që aspirojnë shumica e shqiptarëve të ndershëm, e plot dinjitet, të edukuar, të shkolluar me djersën e tyre, plot dije e aftësi. Por që nga “kokë përmbysja” e shtetit tashmë janë në fund, nën peshën e kërcënimin të “banditëve e injorantëve të kollarisur”! Që kjo “kokë përmbysje” të rrutullohet 180 gradë për t’u rivendosur ku duhet, duhet lëvizur tashmë i gjithë mekanizmi. Gjë që kërkon forcën lëvizëse të qytetarëve”,-thuhet në postim.