Miratohen komisionet për koncesionet në shëndetësi dhe të dhënat e TIMS

Zbardhet marrëveshja PS-PD, Bardhi: Rikthim menjëherë në normalitet në Kuvend Çuçi: Grup pune për ligjet me 84 vota

BalkanWeb ka zbardhur marrëveshjen mes PS-së dhe PD-së së Rithemelimit, e arritur në Konferencën e Kryetarëve. PS dhe PD kanë arritur marrëveshjen, për të ngritur komisionin hetimor për koncesionet në shëndetësi dhe komisionin hetimor për nxjerrjen e të dhënave të sistemit TIMS.

Komisioni hetimor do të përbëhet nga 15 anëtarë, nga të cilët kryetari dhe 6 anëtarë propozohen nga Grupi Parlamentar i PD dhe 8 anëtarë propozohen nga Grupi Parlamentar i PS-së. Përbërja e Komisionit caktohet me vendim të veçantë të Kuvendit. Komisioni hetimor do të zhvillojë veprimtarinë e tij në afat kohor prej 4 muajsh, nga data e miratimit të vendimit. Në rast nevoje, me kërkesë të arsyetuar të komisionit, Kuvendi vendos zgjatjen e afatit të ushtrimit të veprimtarisë së komisionit.

Kreu i Grupit Parlamentar të PS-së, Bledi Çuçi konfirmoi se mes mazhorancës dhe opozitës ka pasur dakordësi për ngritjen e dy komisioneve hetimore. Në një deklaratë për mediat, pas mbarimit të mbledhjes së Konferencës së Kryetarëve, Çuçi tha se janë adresuar problematikat për të vijuar me komisionet.

“Një komision për shërbimet në shëndetësi, sterilizimi dhe check up-i dhe i dytë, komisioni për TIMS. Ramë dakord dhe morëm një vendim që të mandatojmë Komisionin e Ligjeve për të ngritur një platformë për të krijuar një dialog politik për ligjet që kërkojnë 3/5-tat dhe janë pjesë e agjendës së integrimit evropian. Emrat do të miratohen javën tjetër. Ne mandatuam që brenda Komisionit të Ligjeve të ketë një grup pune me numër të barabartë dhe konsensus”,-tha midis të tjerash. Kreu i Grupit Parlamentar të PD-së, Gazment Bardhi deklaroi sot se do të nisë menjëherë puna në Kuvend, për të dëgjuar zërin e qytetarëve.

“Në vijim të mbledhjes së shkuar të Konferencës së Kryetarëve ku ramë dakord në parim për të normalizuar veprimtarinë në Kuvend, sot u vendos në dakordësi të plotë mes gjithë anëtarëve të marrë vendimet që konkretizojnë atë dakordësi. Është rënë dakord, siç e dini, miratimi i komisionit hetimor për kontratat dhe sterizilim dhe chekup apo dhe për ngritjen e komisionit hetimor për sistemin TIMS. Këto kanë qenë shqetësimet tona. Siç kemi deklaruar prej 5 muaj edhe pse jemi akuzuar, ne rikthehemi menjëherë në normalitet që të jemi zëri i qytetarëve. Sot po tregojmë se kemi bërë atë që kemi thënë në këto 5 muaj”,-tha ai.

Kreu i Grupit Parlamentar të PD, Gazment Bardhi ka deklaruar për mediat pas përfundimit të Konferencës së Kryetarëve se krerët e komisioneve hetimore që u “fituan” nga opozita do të drejtohen nga kryetarë që do të zgjidhen nga grupet parlamentare përkatëse.

I pyetur nëse ai vetë do të drejtojë një prej komisioneve hetimore, Bardhi u shpreh se ai është kryetari i grupit parlamentar të PD dhe si i tillë do të paraqesë propozime emrash te kolegët demokratë për këtë çështje.

Kush do t’i drejtojë komisionet parlamentare?

Bardhi: Kjo nuk është çështje e Konferencës së Kryetarëve, por e grupeve parlamentare. Pra, do të jetë vendimmarrje e grupeve parlamentare në vijim. Si kryetar i grupit parlamentar, nuk pret besoj të ta bëj ty propozimin një herë ty, pastaj kolegëve të grupit parlamentar.

Nuk kam ndërmend ndalem te projeksioni i kolegëve që do jenë në komisionet përkatëse. Në konferencën e kryetarëve pati një dakordësi për t’iu rikthyer jetës parlamentare, detajet e tjera do të keni mundësi në ditët në vijim, mos i merrni të gjitha lajmet sot. Të jeni të sigurt se çdo denoncim që kam paralajmëruar që do të bëj do të bëhet, brenda apo jashtë komisionit. Patjetër që mbledhjet e komisioneve hetimore do të jenë të hapura.

A do të jeni një prej kryetarëve të komisioneve hetimore?

Bardhi: Unë jam kryetar i grupit parlamentar, do të shkoj me propozime te kolegët e grupit parlamentar.