Arrestimi i Evis Berberit/ Inxhinieri Nazarko: Edhe ministrja Balluku duhet të mbajë përgjegjësi, korrupsioni po shemb rrugët

TIRANË - Inxhinieri Romeo Nazarko, i cili denoncoi në Prokurorinë e Posaçme rrugën Korçë-Ersekë, deklaroi dje në “News 24” se edhe ministrja e Infrastrukturës, Belinda Balluku duhet të mbajë përgjegjësi për rastin. Nazarko shtoi se edhe anëtarët e Bordit kanë përgjegjësinë e tyre në këtë rast. “Arrestimet vijnë si rezultat i moszbatimit të ligjeve nga këta zyrtarë, por lidhjet mund të shkojnë edhe më tej se Berberi. Të gjithë drejtorët e ARRSH po bien në pranga. Drejtori ka një pjesë të përgjegjësisë, por përgjegjësi kanë dhe zyrtarë të tjerë. Përgjegjësi kanë edhe anëtarët e bordit. Bordi ka qenë në dijeni të pabarazive në tendera të Belerit. Ne na lind dyshimi se Berberi mund t’i ketë dhënë tendera edhe anëtarëve të Bordit. Korrupsioni bën që të shemben rrugët. Është përgjegjësi e ministrisë që të bëjë urdhrin e inxhinierit, ende nuk kemi ligjin e urdhrit të inxhinierit. Edhe ministrja Balluku duhet të mbajë përgjegjësi ligjore. Nuk ka ndodhur në 100 vjet shtet që të bjerë një urë pa u inauguruar. Besoj se kemi të bëjmë me gabim sistematik. Një gabim që ka bërë Ergys Verdho, drejtori aktual e ka bërë më keq. Rruga Korçë- Ersekë është një udhë me qëndrueshmëri të dobët, nuk janë bërë studimet e duhura. Nuk e kanë pasur hallin të bëjnë rrugën, por hallin e kanë tek vlera”,-u shpreh Nazarko. Ai deklaroi se shembja e rrugës ndodhi për shkak se nuk u respektuan standardet teknike, që monitorohen direkt nga Ministria e Infrastrukturës. Romeo Nazarko u shpreh se aksi KorçëErsekë është projektuar keq që në gjenezën e saj, duke shtuar se “i gjithë problemi ishte vlera, jo se donin të bënin rrugë. “U rrëzua rruga Korçë-Ersekë akoma pa u inauguruar, ministrja duhet të kishte dhënë menjëherë dorëheqjen. Ka rënë si pasojë e mosrespektimit të standardeve teknike, që monitorohen direkt nga ministria e linjës. Muret janë mbajtëse, por nuk mban dot veten e vet. Nuk mban dot gjithë ngarkesën nga shembjet masive që ka. Ergys Vjerdho ka qenë iniciatori i këtij abuzimi, këto janë gabim sistematike. Një gabim që ka bërë Ergysi ky e ka vazhduar dhe drejtori i radhës që do të vijë do të vazhdojë trashëgojë. Që në gjenezë është një rrugë e projektuar keq, në një strukturë jo të qëndrueshme. Është një shtrat me qëndrueshmëri të dobët, nuk janë bërë studime fiziologjike në kohën e duhur. Gjithë problemi ishte vlera, jo se donin të bënin rrugë”,-u shpreh ai në “News24”.