Topi për paktin: Kaosi në Kuvend, për të arritur një pazar të ri
Kryetari i PD, Basha: Në Parlament duhet të fliten të vërteta të mëdha “Marrëveshja e 2008, ‘shpërthimi’ i themeleve”
Kryetari i Partisë Demokratike Lulzim Basha ka zhvilluar një tryezë “Harku opozitar Euro-Atlantik” ku ka mbledhur figura të njohura të opozitës, të cilët momentalisht nuk janë pjesë e politikës.
Në fjalën e tij në hapje të tryezës, Basha u shpreh se nesër është afati i fundit i komisionit të reformës zgjedhore, ndërkohë që takimin e sotëm e quajti një kambanë alarmi për interesat e shqiptarëve.
Kryedemokrati tha se interesat e shqiptarëve edhe një herë rrezikojnë t’i nënshtrohen interesave të ngushta personale të atyre që me ndryshimet kushtetuese të vitit 2008 përmbysën balancën institucionale, përqendruan pushtetin dhe në këtë mënyrë dëmtuan jo pak funksionimin e demokracisë, llogaridhënien politike, rolin e parlamentit dhe vetë përfaqësimin e interesave të qytetarëve.
“Sot ndodhemi më pak se një vit nga data fillestare e caktimit të zgjedhjeve, sipas kodit zgjedhor dhe në një moment tërësisht të parapërgatitur nga një pjesë tjetër e politikës, për t’i mohuar shqiptarëve, përfitimet e një reforme të vërtet zgjedhore. Nesër është afati i fundit i komisionit të reformës zgjedhore dhe nuk është e rastësishme që kjo tryezë dialogu me gjithë faktorët politik, partitë politike opozitare mbahet sot pikërisht si një këmbanë jo për interesat e partive politike që përfaqësoni, por për interesat e shqiptarëve që edhe një herë rrezikojnë t’i nënshtrohen interesave të ngushta personale të atyre që me ndryshimet kushtetuese të vitit 2008 përmbysën balancën institucionale, përqendruan pushtetin dhe në këtë mënyrë dëmtuan jo pak funksionimin e demokracisë, llogaridhënien politike, rolin e parlamentit dhe vet përfaqësimin e interesave të qytetarëve”,tha ai. Ish-presidenti Bamir Topi, i pranishëm në tryezën “Harku opozitar Euro-Atlantik” të organizuar nga PD, u shpreh se ka ardhur koha që në Kuvend të fliten të vërteta të mëdha.
Topi foli edhe në lidhje me një marrëveshje mes mazhorancës dhe opozitës për kthimin në normalitet të jetës parlamentare, tha se duhej bërë një betejë e ashpër, jo e dhunshme. Sipas tij dhuna, kaosi në Kuvend ishte vetëm një mënyrë për të bërë presion që të arrihej një pazar i ri.
“Halli i madh i ka bërë t’i rikthehen simbiozës, duan të bëjnë një 2008 të dytë. Duhet bërë një betejë e ashpër, jo e dhunshme, por e ashpër.
Skenat në Parlament dhanë një imazh të keq dhe sot shohim po të njëjtën gjendje. Një presion i shtuar për të arritur një pazar të ri. Në Parlament ka ardhur koha të fliten të vërteta të mëdha”,-tha ai.
Gjithashtu, Topi tha se nuk është pjesë e asnjë partie politike, por është dëshmitar se si u rrënuan themelet e shtetit kur ai ishte president në 2008.
“E pranova me kënaqësi ftesën e Bashës. Dua të sqaroj statutin tim në këtë tryezë, nuk jam pjesë e partive politike. Por për këtë çështje kam pasur rastin të njoh aktorët, protagonistët, e rrënimit të themeleve të shtetit nga pozicioni i kreut të shtetit në 2008. Është detyrim qytetar, intelektual, pasi zgjedhjet vërtetë realizohen si konkurrencë mes partive politike, por ata që janë burim i demokracisë janë njerëzit. Një zë i lirë individual është i rëndësishëm. Prilli i 2008 erdhi shumë shpejt, pas një ngjarje tragjike, e kam fjalën për shpërthimin e Gërdecit. Kujtoj mirë një kryeministër në hall, një mazhorancë në hall, për përgjegjësinë dhe uljen e kredibilitetit si në mjedisin politik edhe në atë ndërkombëtar. Papritur vijnë komunikime të nëndheshme të një marrëveshjeje të errët dhe okulte që paralajmëronte një shpërthim tjetër, atë të themeleve të shtetit, që parashikohej në Kushtetutë. Pa komunikimeve pashë që ishte një mur i lartë i ndërtuar nga njeriu në hall dhe nga tjetri që aspironte të ndërtonte pushtetin e tij të ardhshëm mbi dramën që po konsumohej. Paralajmërimin e parë e bëra më 15 prill 2008 duke thënë çdo të ndodhte pas atij ndryshimi. Ftoj të gjithë politikanët t’i rikthehen marrëveshjes, e cila është komplekse dhe shumëdimensionale. Dobësoi rolin e presidentit dhe prishi balancat institucionale.
Sot kemi partitë politike të protagonistëve që sot konsiderohen si kazerma. Listat e deputetëve vijnë me firmën e kryetarit, Kuvendi uli ndjeshëm cilësinë e tij në përfaqësim dhe rolin e tij. Ka rënë në thundrën e kryeministrit”,tha ai.