Masat mbështetëse në bujqësi, bilanci: Kryesoi Vlora me 20.2% të disbursimit total
Vlora është qarku që ka përfituar shumën më të madhe të disburuar nga masat mbështetëse në bujqësi. Ministria e Bujqësisë dhe Zhvillimit Rural në përmbledhjen për programet dhe buxhetin e vitit 2023 raportoi se qarku i dytë me përfitimin më të madh ishte Fieri. Sipas të dhënave zyrtare fondet për masat e mbështetjes, arritën në rreth 5.1 miliardë lekë në total, nga të cilat 2.7 miliard lekë për skemat kombëtare.
“Qarqet me numrin më të lartë të përfituesve dhe disbursimit të fondeve kanë qenë: Vlora me rreth 20.2% të fondit total të disbursuar, Fieri me 15.3% të fondit, Korça me 13%, Gjirokastra me 12.6%, Berati me 9.6% të fondit të disbursuar, e kështu me radhë. Qarku me përfitimin më të ulët të fondit është Lezha me rreth 2.4% të fondit. Po kështu, numri më i lartë i aplikimeve në masën e mbështetjes për blegtorinë ka qenë në qarkun e Vlorës, ndjekur nga qarku Korçës, Fierit dhe Gjirokastrës” thuhet në raportin e monitorimit.
Por cilat janë konkretisht masat që kanë përfituar më shumë fonde sipas aplikimeve që kanë bërë. Të dhënat e ministrisë tregojnë se gjatë vitit 2023, aplikuan gjithsej në masat kombëtare rreth 13,956 aplikantë, nga të cilët pas procesit të shqyrtimit dhe vlerësimit, u disbursuan 13,214 përfitues, ose rreth 95 % e tyre. “Gjatë vitit 2023, për herë të parë, të gjitha aplikimet e rregullta kanë përfituar dhe janë disbursuar 100%. Disbursimi më i madh i fondeve ishte tek masa Nr. 2, “Mbështetje për tufën bazë të matrikulluar, krerë/dele/dhi” me rreth 46% të fondit të disbursuar, ndjekur nga masa Nr. 1 “Mbështetje për tufën bazë të matrikulluar, krerë/lopë”, me rreth 26%, tek masa Nr. 3 “Mbështetja për mbarështimin e bletarisë”, me rreth 15%, si dhe tek masa Nr. 4 “Mbështetje për fara/fidanë dhe inpute të tjera”, me rreth 12.6% të fondit të disbursuar. Po ashtu në këto masa ka qenë dhe numri më i lartë i aplikimeve dhe përfituesve” thuhet në raport.
Në aspektin gjinor raporti vlerëson se numri i përfituesve gra nga skema mbështetëse ka qenë rreth 15.7% e numrit total të përfituesve, përqindje e cila ka ardhur gjithnjë e në rritje, kjo si rezultat i ndërgjegjësimit të grave, përmes strukturave të ekstensionit bujqësor, transferimit të njohurive, takimeve informuese, etj.
“Një fond prej 123.8 milion lekë u transferua për mbështetje për ndërtimin e 5 tregjeve bujqësore, në bashkitë përkatëse, sipas një procedure konkurruese. Të paktën 24 subjekte përfituan për rinovim të infrastrukturës së anijeve të peshkimit. Po ashtu 103 subjekte përfituan përmes skemës së mbështetjes për fermat organike, si dhe 2 subjekte për certifikimin Global Gap” nënvizon ministria./ MONITOR