Lutje për më shumë besim, më pak dhunë e varfëri/ Besimtarët katolikë në Shkodër, Lezhë, Durrës, Fier, Lushnjë dhe Korçë kremtuan Pashkët

Qindra besimtare katolikë morën pjesë në meshën e vigjiljes se Pashkëve, mbrëmjen e së shtunës në katedralen e “Shën Shtjefnit” në Shkodër, e cila u celebrua nga arqipeshkvi imzot Angelo Massafra. Në mesazhin e tij, arqipeshkvi u ndal tek sakrifica e Krishtit për ta bërë njerëzimin më të mirë duke i kujtuar besimtareve se falja është për të gjithë, edhe për ata të cilët nuk janë të mirë. Kremtimi i Pashkëve, vijoi edhe të Dielën e Madhe me meshën e shenjte dhe vizitat e urime pranë Arqipeshkvise së Shkodrës. Edhe në Pukë besimtarët e krishterë u mblodhën në Kishën “Shën Gjon Pagzori” të qytetit ku pritën ringjalljen si moment shprese për botën e trazuar. Ata u lutën për më shumë besim, më pak dhunë e varfëri, më shumë besim dhe dashuri edhe ndër familjet e qytetit të tyre, ku mbizotërojnë largimet e përditshme. Mesha e Pashkëve që njofton ringjalljen pas dhunimit dhe vuajtjes mbar simboliken e triumfit të së mirën mbi të keqen, teksa besimtarët edhe në Pukë shtrin dorën e paqes dhe bashkëpunimit me urimet e ndërsjellta të festës. Me qirinjtë e lutjes në duar, që simbolizojnë dritën e përjetshme, të krishterët në Lezhë, kremtuan Pashkët. Qindra besimtarë, ju bashkuan meshës së shenjtë që simbolizon ringjalljen e Jezu Krishtit, e cila u mbajt në katedralen e “Shën Nikollit”. Rituali i cili zgjati deri në mesnatën e së shtunës, u drejtua nga ipeshkvi i Dioqezës së Lezhës monsinjor Otavio Vitale, i cili në fjalën e tij para besimtareve, duke ju referuar simbolikës së festës së pashkëve tha se Jezusi duhet të jetë në qendrën e jetës tonë si e vetmja mënyrë për të mposhtur frikën e çdo gjë tjetër. Pas meshës së shenjtë besimtarët e Krishterë u drejtuan në shtëpitë e tyre me dritën e jetës dhe mesazhin Krishti u ringjall. Pashkët janë festa me e madhe e kalendarit liturgjik të Kishës Katolike dhe të kishave të tjera të krishtera, në të cilat u festua Ringjalljen e Jezusit, sikundër e tregon Besëlidhja e Re. Në Durrës mesha për Pashkën u mbajt në kishën “Shën Domenikane”.Të shumtë ishin qytetarët durrsakë, të cilët morën pjesë në meshë, ndërsa u lutën për paqe, mbarësi dhe shëndet në familjet e tyre. Po ashtu, besimtarët katolikë në Fier kanë kremtuar Pashkët në “Kishën e Zonjës së Papërlyer”. Dhjetëra besimtarë kanë ndjekur dje meshën e ringjalljes së Jezu Krishtit ku janë bashkuar për të uruar ringjalljen e tij, duke përcjellë mesazhe shprese dhe dashurie. Të njëjtat mesazhe ndau në fjalën e tij edhe Dom Francesco Pasqua, i cili drejtoi liturgjinë e shenjtë me lutje ndaj Zotit dhe duke respektuar të gjitha ritet e kësaj feste. Pashka është kremtimi më i madh i kalendarit liturgjik të kishës katolike romake dhe të kishave të tjera të krishtera që kremtojnë ringjalljen e Jezusit të Nazaretit ndodhur sipas Besëlidhjes së Re, tre ditë pas vdekjes së tij në kryq. Në përfundim të Meshës së Shenjtë besimtarët katolikë fierakë uruan njëritjetrin, për më shumë paqe, begati, dhe dashuri në familjet e tyre. Besimtarët katolikë të Lushnjës u mblodhën në kishën e shenjtëve “Pali dhe Pjetri” për të marrë pjesë në meshën tradicionale të Pashkës. At Pavlin Zefi, i cili drejtoi meshën dhe në fjalën e tij përçoi mesazhet e domethënies së Pashkës, si fitore e jetës mbi vdekjen. Ndërsa, besimtarët katolikë në Korçë në vigjilje të festës së Pashkës iu drejtuan Kishës katolike “Ngjitja e Marisë në Qiell” për të kremtuar meshën e Pashkëve. Mesnata solli për besimtarët katolikë lajmin e gëzuar se “Krishti u ringjall” ndësa mesha e Pashkës është mbajtur nga prifti Dom Ignazio Bonsignore. Urimet e përcjella nga besimtarët, janë për dashuri e solidaritet mes njëri-tjetrit.