Shumica bojkotoi komisionin hetimor, Vokshi: Rama ka frikë nga hetimet

“I jemi drejtuar me kërkesë KLSH, Kryeministrisë dhe dy ministrive” Mbahet pa prezencën e socialistëve mbledhja

Ka nisur pa prezencën e përfaqësuesve socialistë, Komisioni Hetimor për Shëndetësinë. Në këtë komision morën pjesë përfaqësues të opozitës. Kryetarja e Komisionit Hetimor për Shëndetësinë Albana Vokshi tha se Edi Rama dhe të tijtë kanë frikë nga hetimet e komisionit, prandaj dhe kanë zgjedhur të mos jenë të pranishëm. Vokshi në mesazhin e saj nënvizoi se komisioni hetimor duhet të nisë punën sa më parë, që hetimeve për koncesionet në shëndetësi t’ju shkohet deri në fund.

“Edi Rama dhe anëtarët e PS në komision nuk kanë ardhur, pasi kanë frikë nga ky komision. Mazhoranca po shkel përditë ligjet dhe Kushtetutën. Është kjo qeveri që ka frikë nga gjithçka, pasi ka abuzuar me pushtetin në 10 vite. Ne nuk kemi kohë për të humbur, hetimi duhet të nisë sa më parë”,-u shpreh Vokshi.

Ditën

e djeshme ishte parashikuar të mbahej Komisioni Hetimor për Shëndetësinë, që u bojkotua nga mazhoranca.

Kryetarja e komisionit Albana Vokshi mbajti një konferencë për shtyp.

Vokshi: Rregullorja i ka dhënë një instrument opozitës edhe kur mazhoranca nuk ka vullnetin për t’u mbledhur.

Nëse mazhoranca nuk dëshiron, ¼ e anëtarëve mund të caktojnë orën, ditën dhe rendin e mbledhjes pasardhëse. Me firmat e 7 deputetëve, gati gjysma njoftuam se mbledhja ishte sot(dje). Grupi i deputetëve të PS u njoftua në të gjitha mënyrat. Por për të dytën herë radhazi vijuan në vazhdën e shkeljeve ligjore dhe të Kushtetutës e Rregullores së Kuvendit. Që para se të mblidhej komisioni në mbledhjen e parë, bëra një bisedë me Ndrecën dhe i kërkova miratimin e një rregullore të posaçme, por u refuzua nga mazhoranca. Mazhoranca refuzon sepse Ramës nuk i intereson që komisioni të vijojë punën.

Kryetarja e Komisionit Hetimor për Shëndetësinë, Albana Vokshi, në një deklaratë për mediat ka njoftuar se ky komision i është drejtuar me kërkesë për informacion disa institucioneve, në mënyrë që të zbulohet e vërteta në lidhje me koncesionet.

Vokshi: Kemi mbledhur firmat për mbledhjen e radhës, ditën e martë 10:30. Kemi mbledhur dokumentacionin për t’ua drejtuar institucioneve. Shkresa e parë i është dërguar Kryeministrisë, më tej KLSH-së ku kemi kërkuar të gjitha llojet e auditimeve bashkë me shkresat shoqëruese për të hartuar raportet e tyre.

I jemi adresuar për procedurën ligjore edhe Ministrisë së Financave, APP dhe Ministrisë së Shëndetësisë. I jemi drejtuar ministres Alban Koçiu për fondet që i janë dhënë koncesioneve për çdo vit dhe për muajt e 2024.