Shehu kërkon interpelancë me kryeministrin: Serbia komandon Kuvendin
Gjenocidi serb në Kosovë
Deputeti i PD-së Tritan Shehu kërkon interpelancë me kryeministrin Edi Rama në lidhje me situatën e krijuar nga qeveria e Shqipërisë, për të mbajtur një qëndrim të qartë ndaj gjenocidit serb në Kosovë.
Interpelancë me Kryeministrin-Serbia komandon Kuvendin!
Ndërsa mazhoranca bllokon pa fund e arbitrarisht mocionin me debat për njohjen e dënimin e gjenocidit serb në Kosovë të kërkuar nga ne. Nuk pranon t’i rekomandojë qeverisë të asistojë qeverinë e Kosovës për njohjen e dënimin ndërkombëtar të atij gjenocidi.
Dorëzova kërkesën për interpelance me kryeministrin mbi këtë subjekt. Si personi përgjegjës për këto qëndrime ndesh me të vërtetat historike, ndesh interesat tona kombëtare e te rajonit. Të vërteta, që duhen zyrtarizuar nga Kuvendi ynë veçanërisht në këto momente të revanshit ruso/serb edhe si një detyrim sublim ndaj partnerëve tanë më të rëndësishëm, NATO-s. E ftoj kështu Kryeministrin të shpalosë arsyet e këtyre qëndrimeve thellësisht dëmtuese të mazhorancës ndaj Kosovës, shqiptarëve në tërësi, rajonit në një interpelancë parlamentare. Kërkesën zyrtare të interpelancës po e bashkëngjis.
Lënda: Kërkesë për interpelancë
Drejtuar: Zonjës Lindita Nikolla
Kryetare e Kuvendit t¸ Shqipërisë
Këtu
Bazuar në nenin 80, pika 1 të Kushtetutës dhe nenin 96/84 të Rregullores së Kuvendit, ju paraqes kërkesën për interpelancë ndaj Kryeministrit në lidhje me platformën politike të tij e të qeverisë shqiptare, për hapat e ndërmarrë në mbështetje të qeverisë së Kosovës në drejtim të njohjes e dënimit ndërkombëtar të gjenocidit e pastrimit etnik serb në Kosovë, në vitet 1998-99, për çështjet si më poshtë vijon:
1- Në lidhje me vizionin që ka Kryeministri e qeveria për atë gjenocid e pastrim etnik serb në Kosove, jo vetëm si një tragjedi historike, por dhe si një krim, i cili me pasoja shumë dimensionale rëndon akoma mbi rajonin.
2- Në lidhje me domosdoshmërinë që Kryeministri gjen te njohja e dënimi nga drejtësia ndërkombëtare i atij gjenocidi e pastrimit etnik serb në Kosovë.
3-Për bashkëpunimin e strategjinë e përbashkët, që duhet të ketë qeveria e Shqipërisë me atë të Kosovës për këtë objektiv.
4-A e konsideron Kryeministri këtë bashkëpunim, që fillon me njohjen e dënimin nga të dy vendet tona të atij gjenocidi e pastrimi etnik, si një element tejet i rëndësishëm jo vetëm në forcimin e marrëdhënieve Shqipëri-Kosove, por dhe në forcimin e bashkëpunimit e rolit ete faktorit shqiptar në rajon, në dobi edhe të stabilitetit e rrugës europiane të tij.
5-A e konsideron Kryeministri të domosdoshme edhe për këtë objektiv, njohjen e dënimin zyrtar nga Kuvendi i Shqipërisë, me dokument të veçantë, eksplicit, me kërkesë qoftë dhe deklamative ndaj qeverisë shqiptare, për të asistuar Kosovën pranë gjykatës ndërkombëtare për këtë njohje ndërkombëtare, ndërkohë që Kosova ka pengesa në këtë proces, sepse nuk është anëtare e OKB.
6-Si e konsideron Kryeministri, qoftë edhe politikisht, bllokimin e kërkesës brenda kuadrit të rregullores të një grupi deputetësh të PD, për një mocion me debat e rezolutë, pikërisht për këto qëllime.
7-A i konsideron Kryeministri në këtë drejtim marrëdhëniet e “ftohta” aktuale Shqipëri-Kosovë e veçanërisht faktin që ishte Shqipëria, që vendosi sanksionin e parë ndaj Kosovës duke bojkotuar takimin e atëhershëm ndërqeveritar, si një shkak i këtij bllokimi.
8-A e konsideron kryeministri si një shkak për këtë bllokim “ultimatumin” e Vuçiçi sipas të cilit do të bëjmë të gjitha përpjekjet për të mos lejuar “Parlamentet e vendeve miq” të njohin e dënojnë atë gjenocid.
9-A e gjykon Kryeministri se shkak i atij bllokimi ishte e është edhe projekti i Vuçiçit për “Ballkanin e hapur”, shumë i mbështetur nga Z.Rama edhe në këtë sallë Parlamenti, që megjithëse tashme ka “avulluar” vazhdon të mjegullojë të vërtetat historike.
10-Si e konsideron Kryeministri vendimin e Kuvendit të Kosovës për njohjen e dënimin edhe formal të atij gjenocidi e pastrimi etnik, akt ai që duhet të ndiqet edhe nga Kuvendi i Shqipërisë.
11- A e mbështet Kryeministri thirrjen e Znj. Osmani e Z. Kurti për të bërë të gjitha përpjekjet për njohjen ndërkombëtare të atij gjenocidi e pastrimi etnik.
12- A e konsideron të domosdoshme Kryeministri për stabilitetin e rajonit e normalizimin e marrëdhënieve të Serbisë me Kosovën, pranimin e kërkimin ndjesë nga Serbia të atij gjenocidi e pastrimin etnik.
13-A e shikon Kryeministri faktin e mospranimit të këtij gjenocidi nga Serbia si një burim i agresivitetit serb në Kosovë, deri në aktet e fundit terroriste ndaj atij vendi sovran.
14- A e shikon Kryeministri këtë qëndrim serb të lidhur me riaktivizimin e ëndrrave për Serbinë e madhe nëpërmjet “shkëmbimit të territoreve”.
15-A e konsideron Kryeministri këtë qëndrim të Serbisë të lidhur edhe me aspiratën e saj për “Jugosllavinë e re” nëpërmjet “Ballkanit të hapur”.
16-A e konsideron Kryeministri mosnjohjen e atij gjenocidi e pastrimi etnik nga Serbia të lidhur edhe me qëllimet destabilizuese e interferencat ruse në rajon. E lidhur kjo edhe me mospranimin nga Serbia të vendosjes së sanksioneve ndaj Rusisë si kundërpërgjigje të agresionit në Ukrainë.
17-A e konsideron kryeministri jo vetëm si një faktor stabilizues e ndihmues për integrimin europian të rajonit domosdoshmërinë për të thënë qartësisht të vërtetat historike, njohur e dënuar gjenocidin serb, lidhjet e saj me Rusinë, por dhe si një mekanizëm ky ndihmues për opozitën pro perëndimore aty.
18-A e konsideron Kryeministri të domosdoshme njohjen e dënimin ndërkombëtar të atij gjenocidi e pastrimi etnik, veçanërisht në këto momente kur Rusia po kërkon që KS të OKB të rianalizojë për të dënuar ndërhyrjen e NATO ne Kosove, ndërhyrje që kishte në themel gjenocidin e pastrimin etnik serb aty.
19-A e konsideron Kryeministri, veçanërisht nën këto zhvillime të reja e shqetësuese, njohjen eksplicite nga Kuvendi e qeveria shqiptare të atij gjenocidi e pastrimi etnik, punën e përbashkët me qeverinë e Kosovës për njohjen e dënimin ndërkombëtar të tij, si një detyre parësore me interes të madh kombëtar e rajonal, me themele morale, vlerash, por dhe konkrete stabilizuese, si një shprehje e mirënjohjes së pafund ndaj NATO, SHBA, BE, që ndërhynë për të shpëtuar popullin e Kosovës e paqen në Rajon.
Mbetem në pritje të caktimit të datës së zhvillimit të interpelancës në përputhje me afatet e përcaktuara në Kushtetutën e Republikës së Shqipërisë dhe Rregulloren e Kuvendit
Ju faleminderit për bashkëpunimin!