Djalin 3 vjeç ia morën gjyshërit/ Nëna mes lotësh: Ish-vjehrri më tha nuk ta sjellim më, edhe policisë i bëri presion
DURRËS - Prej pesë ditësh nuk dihet fati i një fëmije 3-vjeç, i cili është marrë nga gjyshërit e tij nga ana e të atit. Fëmija jetonte me mamanë tij, ndërsa babai i kishte ndërruar jetë një vit më parë në një aksident rrugor. Blutë kanë shoqëruar gjyshin e fëmijës Rexhep Gunin 58 vjeç. Ndërkohë, që nëna e 3-vjeçarit tha dje se ka 4 ditë që nuk di se ku e ka fëmijën. Ajo ka deklaruar se gjyshërit kanë marrë si çdo javë nipin e tyre për ta mbajtur disa orë në familjen e tyre siç bënin zakonisht, por nuk e kanë kthyer më. Ille Gjuni ka pritur disa orë dhe kur vjehrri me vjehrrën nuk i kanë kthyer fëmijën i ka telefonuar, por celulari i tyre ka rezultuar i fikur. Gruaja ka bërë denoncim në polici dhe uniformat blu kanë arritur të gjejnë vetëm 58-vjeçarin Rexhep Gjuni, por jo bashkëshorten e tij dhe fëmijën. Fillimisht 58-vjeçari ka deklaruar se fëmija ndodhet në Kukës te disa të afërm, por policia e Kukësit nuk e ka gjetur. Më pas, Rexhep Gjuni ka refuzuar të bashkëpunojë me policinë. “Jam e shqetësuar. Nuk e di ku ndodhet fëmija im. Nuk e di nëse është mirë. Kërkoj nga policia të bëjë të mundur gjetjen e tij. Nuk e di pse ndodhi kjo pasi nuk e kam penguar kurrë fëmijën të shkonte te gjyshërit e tij”, ka deklaruar nëna e djalit 3vjeçar. Pas vdekjes së bashkëshortit marrëdhëniet e saj me vjehrrin dhe vjehrrën nuk kanë qenë të mira. Gruaja ishte larguar nga shtëpia e burrit dhe jetonte me të atin. Mes dy familjeve kishin nisur kontradikta pasi gjyshërit kërkonin që ta rrisnin ato të voglin, ndërsa mamaja tregoi se kishte pranuar që ata ta mbanin disa orë në fundjavë. Kështu ka ndodhur dhe të shtunën e 13 prillit kur e kanë marrë në mëngjes por më pas nuk ia kanë dorëzuar. Pasi shkoi në banesë dhe e gjeti të mbyllur bëri denoncimin. Nëna mes lotësh ka treguar se kur i ka telefonuar ata i kanë thënë se nuk do ia japin më djalin dhe se policisë i kanë bërë presion që t’u plotësoheshin kushtet që ata kanë. “E morën dhe nuk e kanë sjellë. Bashkëshorti im ka 1 vit e 2 muaj që ka ndërruar jetë. Ato duan të më marrin djalin. Në fillim nuk ma jepnin kam ikur me zor. Vjehrri dhe vjehrra vinin dhe e takonin. Jua lija çdo fundjavë disa orë, nga ora 09:00 deri në 15:00. E morën këtë radhë dhe nuk e sollën më. Kur shkoi ora dhe i mora në telefon më thanë nuk ta sjellim më. I denoncova në polici. Ai u bënte presion policinë, kërkonte kushte, që ta merrte ai, të mos dilte jashtë shtetit. Vjehrri nuk tregon se ku është fëmija. Thotë që nuk e di. Gënjen! Familja e ish-bashkëshortit janë nga Kukësi. Dua djalin, shteti e policia të ma sjellin. Ka disa ditë që nuk është këtu. Mos e kanë dërguar jashtë shtetit? Unë jetoj tek prindërit e mi. I kemi afër me shtëpi gjyshin dhe gjyshen e djalit”, tha ajo. Ndërkohë është dhënë sinjal të kontrollohen pikat kufitare.