Vasili: 5 prioritetet e Partisë së Lirisë për 50 vjet, Shqipëria me 4 milionë banorë

Nënkryetari i Partisë së Lirisë, Petrit Vasili me anë të një statusi në rrjetet sociale, shprehet se Partia e Lirisë ka 5 prioritete kyçe për Shqipërinë për 50 vjet.

Vasili ndër të tjera shprehet se Partia e Lirisë synon të çojë popullatën e vendit në 4 milionë banorë disa vite më vonë, të përmirësojë bujqësinë, që të mirëtrajtohen pensionistët, arsimi të marrë vëmendjen e duhur etj.

Postimi i nënkryetarit të Partisë së Lirisë, Petrit Vasili Pesë prioritete për pesëdhjetë vite!

Dalja nga e keqja, mjerimi dhe pesimizmi i thellë si dhe projektimi me objektiva të qarta dhe vizionare të orientuara drejt të mirës, drejt prosperimit ekonomiko shoqëror të qëndrueshëm janë pikërisht ato, që sjellin atë optimizëm dhe besim tek njerëzit, që zgjat me dhjetëvjeçarë të tërë.

Pesë prioritetet e Partisë së Lirisë kanë pikërisht dimensionin e një të mire kombëtare, që shtrihet në pesëdhjetë vjet.

Zgjidhja e krizës fondamentale asaj të shpopullimit dhe objektivi 4 milionë shqiptarë plus brenda 20 viteve, janë pa as më të voglin dyshim me një efekt që zgjat së paku pesëdhjetë vjet.

Një Shqipëri me një demografi të tillë 4 milionëshe do të përballonte më së miri çdo sfidë që dhjetëvjeçarët do të vendosnin përpara shqiptarëve.

Ideja e çmendur bangladashase e popullimit të Shqipërisë falimentoi pa lindur mirë dhe ishte vetëm një projekt i zi mafioz dhe antipatriotik.

Prioriteti në bujqësi është rivalorizimi themelor i saj dhe me perspektivë për dhjetëra vjet, i një pasurie kaq të madhe, kaq të çmuar dhe kaq strategjike për Shqipërinë dhe ekonominë e demografinë saj.

Prioriteti i trajtimit të pensionistëve është një mesazh, që kalon në dhjetëvjeçarë, sepse jo vetëm zgjidh mjerimin e brezave aktualë të pensionistëve, por është një garanci madhore për të gjithë shqiptarët që do të punojnë në Shqipëri, por edhe do garancinë që do të moshohen dhe pensionohen në mënyrë dinjitoze.

Prioriteti i arsimit është projektimi madhor i fuqisë së edukimit, që i bën brezat të përballojnë në dhjetëra vjet zhvillimet dhe ndryshimet e pritshme të profilit ekonomikoshoqëror e teknologjik të vendit në raport me botën që na rrethon, si i tillë është e qartë që efekti i tij është në së paku pesëdhjetë vjet.

Prioriteti i rikthimit në fuqi eksportuese është rivalorizimi madhor dhe shumëdimensional i pasurisë së terrenit, të asaj minerare, klimatike e natyrore të Shqipërisë, që përfaqësojnë garanci shumë të mëdha, solide dhe të patjetërsueshme për të ardhmen së paku pesëdhjetëvjeçarë të vendit.

Ndaj ky vizion i Partisë së Lirisë i formësuar në 5 prioritete për 4 milionë shqiptarë plus është vizioni i të sotmes dhe të ardhmes larg çdo interesi të vogël elektoral dhe politik dhe që i jep shpresë dhe frymëmarrje vendit për së paku për pesë dekadat që vijnë.

Është, pra ky vizioni, që shpëton vendin nga buzëgremina ku rilindasit e kanë çuar dhe e projekton atë drejt dekadave që vijnë.

Shqiptarët jetojnë të varfër në një vend të bekuar ndaj kjo duhet të marrë fund një herë e përgjithmonë.