Hajdari: Kemi një drejtësi të dështuar, lindore dhe autokrate
Ish- prokurori i dorëhequr: Reforma fuqizon ndjekjen penale
Ish- prokurori Shkëlqim Hajdari ka folur për Reformën në Drejtësi, duke u shprehur se kjo duhej të ishte realizuar më herët, pasi, sipas tij, sistemi i drejtësisë në vend ishte i dështuar. Hajdari thotë se sistemi i drejtësisë në Shqipëri ishte lindor dhe autokrat. “Reforma në drejtësi ishte në mendjen time që para 6- 7 vitesh. Sistemi i drejtësisë që ne kishim nuk mund të funksiononte. Mora përsipër të shpjegoja pse sistemi është i dështuar. E njoh shumë mirë sistemin e drejtësisë, ai ishte sistem drejtësie lindor dhe autokrat. Sistemi ynë dështoi në dhënien e drejtësisë. Prokuroria ishte institucion i centralizuar. Këshilli i Prokurorisë ishte në konflikt të hapur interesi. Këshilli dhe Llalla transferonin njerëz. Ndërsa tashmë reforma fuqizon ndjekjen penale”, tha Hajdari. Ish- prokurori flet edhe për dorëheqjen, duke u shprehur se ka qenë i detyruar ta bëjë këtë, si një akt i përgjegjshëm sensibilizimi. “Kam qenë i detyruar të jap dorëheqjen. Dorëheqja ime erdhi si akt i përgjegjshëm sensibilizimi. Qytetarët s’kanë për ta marrë vesh çfarë ndodhi më 03- 10- 2014. Për ngjarjen janë në dijeni instancat përkatëse”, u shpreh ai. Në një letër të publikuar pak ditë më parë, ai ka shpjeguar arsyet e dorëheqjes së tij. Sipas ish- kryeprokurorit të Apelit, ngjarja e paprecedentë nisi gjatë debatit për shkarkimin e kryetarit të Shoqatës së Prokurorëve.
“Prokurori i Përgjithshëm në këtë moment e humbi kontrollin dhe dukej në një gjendje psikike të rënduar, gjendje që e çoi në një shfrim fyerjesh të rënda ( që për etikë nuk po i shkruaj) dhe më e keqja pas kësaj arriti të më godasë me grusht në fytyrë”, thuhet në letrën e Shkëlqim Hajdarit. Ish- kreu i Gjykatës së Apelit shpjegon në letër se, pas ngjarjes, i është kërkuar që incidenti të mos bëhej publik për mediat, për të ruajtur institucionin e Prokurorisë. “Me gjithë ngjarjen e rëndë, kryeprokurori Adriatik Llalla tentoi në kundërshtim me statusin e Shoqatës së Prokurorëve, jashtë rendit të ditës dhe pa praninë e kryetarit të Shoqatës së Prokurorëve, procedurën për shkarkimin e kryetarit.