Mbyllet me 9 viktima, çmenduritë e 18- vjeçarit të masakrës së Mynihut
Adoleshenti mbante foton e Breivik në profilin e WhatsApp- it, në shtëpi iu gjet libri “Përse vrasin fëmijët”
Autori i masakrës së dy ditëve më parë në Mynih është një 18vjeçar iranian i fiksuar pas vrasjeve masive, pa asnjë lidhje me terrorizmin.
Adoleshenti Ali David Sonboly hapi zjarr në një qendër tregtare të premten mbrëma, duke shkaktuar nëntë të vdekur e 27 të plagosur. Shtatë prej viktimave ishin adoleshentë, të cilët, sipas Policisë, ai i ka ftuar nëpërmjet një adrese false në rrjetin social “Facebook” pikërisht ditën e përkujtimit të masakrës norvegjeze të pesë viteve më parë, ku mbetën 77 të vdekur. I riu me origjinë iraniane u gjend i vdekur në afërsi të skenës ku kreu sulmet, ndërsa në çantën e tij të shpinës figuronin një pistoletë dhe mbi 300 plumba. Deri më tani nuk ka asnjë provë që ai të ketë pasur bashkëpunëtor në masakrën ku mbetën të vrarë tre shtetas turq, tre shtetas kosovarë, një grek dhe dy të tjerë kombësia e të cilëve nuk dihet ende. Sulmi i Mynihut është akti i tretë i dhunës kundër civilëve në Europën Perëndimore dhe i dyti në Gjermani brenda tetë ditëve. Ndonëse ekspertët nuk kanë dalë në një përfundim mbi arsyen që e shtyu të riun të kryejë masakrën, mund të thuhet se tensionet racore në Gjermani janë shtuar ndjeshëm me ardhjen e 1.2 milionë refugjatëve gjatë vitit të fundit. LIDHJA ME BREIVIK Vrasësi iranian, i biri i një taksisti, ka lindur dhe është rritur në zonën e Mynihut, si dhe mbante dy nënshtetësi. Dy vitet e fundit, ai kishte jetuar në të njëjtin qytet. Hetuesit kanë gjetur lojëra me dhunë në kompjuterin e të riut, ndërsa kanë konfirmuar se më herët, ai i ishte nënshtruar edhe kujdesit psikiatrik. Data e masakrës, fiks në 5- vjetorin e sulmit monstruoz të Anders Breivik në Norvegji, me 77 të vdekur, ka bërë që hetuesit të arrijnë në konkluzionin që 18- vjeçari Ali Sonboly të jetë frymëzuar nga ai. “Breivik mund të ketë luajtur ndonjë rol. Ne kemi në dorë këtë çështje dhe po hetojmë”, ka deklaruar Hubertues Andreae, shef i policisë së Mynohut gjatë konferencës për shtyp. Një tjetër dëshmi që lidh ngjarjen e dy ditëve më parë me masakrën në Norvegji ishte fakti se vrasësi 18- vjeçar, të cilin policia e cilëson si person me çrregullime mendore, mbante foton e Breivik në profilin e tij në WhatsApp. Ekstremisti i djathtë 33vjeçar, në 22 korrikun e 2011s tronditi Norvegjinë me dy atentate që vranë tetë persona në qendër të Oslos dhe 69 të tjerë në një kamp veror. Sulmi i ndodhur në ditën kur Norvegjia kujtoi viktimat, shton dyshimet se ngjarja lidhet me neonazistët gjermanë, në shenjë urrejtjeje ndaj të huajve. Sipas policisë, në dhomën ku ka jetuar adoleshenti janë gjetur materiale për sulme masive me armë, mes tyre dhe një libër me titull “Përse vrasin fëmijët”. Vrasësi kishte jetuar me prindërit e tij deri përpara katër viteve. Babai i tij mësohet të jetë një taksist pa të shkuar kriminale. I pyetur nëse vrasësi kishte në shënjestër të rinjtë, shefi i policisë thotë se kjo teori nuk mund të vërtetohet.