Burg dy ish- zyrtarëve, ryshfet për lejen mjedisore
TIRANE - Gjykata e Tiranës dënoi me nga 1 vit e 4 muaj heqje lirie dy ish- inspektorë të Agjencisë Rajonale të Mjedisit pranë Ministrisë së Mjedisit në kryeqytet për "korrupsion". Të pandehurit Taulant Manaj e Florian Progni u shpallën fajtorë për marrjen e një ryshfeti prej 350 mijë lekësh në këmbim të dhënies së licencës mjedisore për një biznes privat në kryeqytet. Në të njëjtin vendim, Gjykata u hoqi të pandehurve të drejtën e ushtrimit të funksioneve publike në periudhën 5 vjet për të pandehurin Manaj dhe 3 vjet për Prognin. Akti korruptiv i dy të pandehurve u denoncua nga programi investigativ "Stop". Kërkuesi i lejes mjedisore për biznesin e "tregtisë me pakicë të produkteve të zgarës" A. M., regjistroi me audio e video takimin me të pandehurin Taulant Manaj, ish- specialist i lejeve dhe Vlerësimit të Ndikimit në Mjedis në ARM, në Qendrën Kombëtare të Licencimit. "Gjatë bisedës Taulanti u ka kërkuar shumën 3000 euro dhe më pas ata kanë rënë dakord se shuma që duhej të paguhej përfundimisht do të ishte 350.000 lekë. Kjo shumë është paguar nga A. M., në dy këste, të pandehurit Florian Progni, i cili u është prezantuar vëllezërve M., nga Taulanti si eksperti që do të bënte matjet", thuhej në vendim. Disa ditë më vonë, A. M., ka ardhur në dijeni nga i pandehuri Florian Progni se leja mjedisore ishte firmosur dhe ai mund ta merrte atë në QKL.