Hakmarrja e hungarezëve, lanë Partizanin pa... ujë
Ndodh edhe kështu. Pas përfundimit të 90 minutave në ndeshjen e kthimit, Ferencvarosh- Partizani, kanë luajtur në stadiumin "Groupama Arena" të Budapestit, ku hungarezët kanë lënë pa ujë stafin e ekipit të kuq. Burime të "Panorama Sport" pranë Partizanit treguan dje për hakmarrjen e hungarezëve kur po luheshin minutat shtesë. "Ishte e pabesueshme. Ne kërkonim një koli me ujë, ndërsa hungarezët bënin sikur nuk dëgjonin, duke mos na përfillur. Sjellja e organizatorëve të takimit ndryshoi çuditshëm, sapo ndeshja shkoi në shtesë. Për shumë minuta nuk na është vendosur në dispozicion ujë i pijshëm, që natyrshëm përdoret nga lojtarët në pushimet mes pjesëve, por për më tepër që në këtë periudhë, kur temperaturat janë të larta, nuk duhet të mungojë kurrë pranë pankinave respektive. Kjo lloj sjelljeje e hungarezëve ka habitur edhe delegatin e ndeshjes, i cili urdhëroi menjëherë punëtorët të vendosnin në dispozicion të skuadrës ujë të pijshëm", tregon për gazetën një prej pjesëtarëve të stafit teknik të skuadrës së kuqe.