Edhe ujësjellësi do privatizohet, Veliaj: Jemi në negociata me disa kompani
“Kemi marrë disa oferta e shprehje interesi nga disa kompani”
Ujësjellësi i Tiranës është drejt privatizimit. Ka qenë vet kryebashkiaku Erjon Veliaj, ai i cili i ka shuar të gjitha dyshimet, duke konfirmuar faktin se ka nisur shqyrtimi i ofertave të para që kanë mbërritur.
Veliaj e lidhi interesin e kompanive private me performancën e UKT- së. Sipas tij, kanë qenë investimet e kryera dhe menaxhimi shumë i mirë i ndërmarrjes ato që kanë dhënë rezultate pozitive. “Kemi marrë disa oferta dhe shprehje interesi. Jemi ende në një proces negociatash dhe dua t’i garantojë qytetarët që do të bëjmë më të mirën, derisa të bindemi që kemi marrë ofertën më të mirë për UKTnë. Së pari, ky është një kompliment për punën e UKTsë, është e para kompani nga 61 ujësjellësit e bashkive e reja që merr një vlerësim të tillë dhe po kuotohet në treg, falë perfomancës në rritje edhe arkëtimeve nga qytetarët, që janë shumë më të përgjegjshëm me përdorimin e ujit të pijshëm, dhe faktit që është dyfishuar nga 6- 7 orë në 13- 14 orë furnizimi me ujë në Tiranë”, u shpreh Veliaj. Kryetari i Bashkisë, ka garantuar qytetarët e Tiranës se nëse ky privatizim do të kryhet me sukses, ai do të ketë vetëm efekte më të mira në furnizimin me ujë të të gjitha familjeve dhe bizneseve, dhe nga ana tjetër, nuk do të ketë asnjë ndikim në faturën e ujit. “Së pari, kjo nuk e impakton çmimin e shitjes së ujit të pijshëm. Ky është një çmim, i cili caktohet nga Enti Rregullator, ashtu si çmimi i energjisë. Pra, nuk ka të bëjë fare kush e ka paketën e aksionarëve në kompani, sepse çmimi caktohet nga Enti Shtetëror i Ujit. Së dyti, i garantoj qytetarët që çdo qindarkë që vjen nga një negociatë e suksesshme do të përkthehet automatikisht në investime për qytetin e Tiranës dhe besoj se shumë shpejt do të kemi mundësi t’i shikojmë frytet gjithë kësaj pune që është bërë”. Këto deklarata Veliaj i bëri gjatë inspektimit të punimeve që kanë nisur të kryhen për shtrimin e rrjetit të kanalizimeve të ujërave të zeza në zonën e ish- Uzinës së Autotraktorëve në Shkozë.